Pîrozbahiya Newrozê ya li Depê li Qada Stasyonê hate lidarxistin. Gelek kes beşdarî pîrozbahiya li warê Kawayê Hemdem Mazlûm Dogan bûn. Bi taybetî jin û ciwan bi kincên xwe yên gelêrî beşdarî pîrozbahiyê bûn.
Piştî deqeyeke rêzgirtinê ya ji bo bîranîna şehîdan, Hevşaredarên Depê, endamên Komîteya Amadekar a Newrozê û nûnerên partiyan axivîn. Di axaftinan de ji bo xwedîderketina li banga ‘Aştî û Civaka Demokratîk’ a Rêber Apo bang hate kirin.
Parlamenterê Rihayê yê DEM Partiyê Omer Ocalan jî anî ziman ku Newroz nîşaneya berxwedana li dijî zilmê ye û destnîşan kir ku Rêber Apo ji bo aştiyeke bi rûmet têkoşîneke mezin dimeşîne. Omer Ocalan got, “Ji ber vê yekê divê em destê Rêbertî li dora maseyê xurtir bikin. Gotin ‘Em ê têkoşîna xwe êdî bi rêyên cuda bimeşînin’. Ji ber vê jî divê dewlet êdî gavan biavêje. Kurdan ji bo hebûna xwe berdêl da, can da. Li gel vê yekê gelê Kurd bi pêşengiya Rêbertî destê aştiyê dirêj kir. Li vî welatî divê em ji bo aştî û çareseriyê têbikoşin.”
Omer Ocalan di axaftina xwe de bal kişand ser bûyerên li Rojhilatê Kurdistanê jî û got, divê Kurd di nava yekîtiyê de tevbigerin.
Omer Ocalan herî dawî silavên Rêber Apo li gel kir.
Piştî axaftinan agirê Newrozê ji aliyê hevjîna yek ji kadroyên pêşeng ên PKK’ê Zekî Yildiz, Emoş Yildiz û parlamenteran ve hate dadan. Pîrozbahiyê bi muzîk û gerandina govendê dewam kir.
