Li Nûnertiya Partiya Yekîtiya Demokratîk (PYD) ya Başûrê Kurdistanê ya li bajarê Silêmaniyê civînek ji bo piştgiriya kampanyaya “Em ê bi yekîtîya jinan Sûriyeyek demokratîk û nenavendî ava bikin” hat lidarxistin.
Civîn ji aliyê Nûnertiya Kongra Star û Meclisa Jinan a Partiya Yekîtiya Demokratîk (PYD) ve bi awayek hevpar hat lidarxistin. Endama Desteya Rêveber ya Kongra Star Emîne Hesen, Nûnera Kongr Star ya Herêma Kurdistanê Necma Elûş û Endama Komîteya Rêveber a Meclisa Jinan a Partiya Yekîtiya Demokratîk (PYD) Bêrîvan Mihemed axivîn.
Berîvan Mihemed di destpêka civînê de xêrhatina mêvanan kir û got: “Ev kampanyaye li Rojavayê Kurdistanê destpê kiriye. Em ji Başûrê Kurdistanê piştgiriyê didinê. Em ji bo her karekî amade ne. Kampanyayê di 20’ê Cotmehê de destpê kiriye û dê heta 12’yê Mijdarê berdewam bike.
Nûnera Kongra Star ya Herêma Kurdistanê Necme Elûş di civînê de axivî û got; “Di şeşemîn salvegera şehadeta Hevrîn Xelef de, me ev kampanya ji bo avakirina Sûriyeyek demokratîk da destpêkirin da ku jin êdî bi zilm û qetilkirinê re rûbirû nebin. Ev yek dê bi yekîtiya jinan pêk were û emê Sûriyeyek demokratîk ava bikin.”
Piştre, Endama Desteya Rêvebir ya Nûnertiya Kongra Star Emîne Hesen da zanîn ku yekîtiya wan bi serê xwe hêzeke û bingeha vê têkoşînê ji hêla Rêber Apo ve hatiye danîn, ku di pêncî salên borî de ev yekîtî ava kir. Her wiha da zanîn ku Rêber Apo jin kir xwedî artêş û xwediya nasnameya xwe ya zayendî.
Di dewama axaftina xwe de Emîne Hesen got; “Rola jinan bi bandore û jin niha ji bo azadiya fîzîkî ya Rêber Apo li kolanan in. Îro, me wekî Kongreya Star kampanyayek ji bo avakirina Sûriyeyek demokratîk da destpêkirin, ku niha piştî hilweşîna Esed dixwazin rola jinan di jinûve avakirina Sûriyeyê de paşguh bikin. Ev tevî wê yekê ye ku jinan di şoreşa Rojavayê Kurdistanê de rolek pêşeng leyîstine. Divê pêşeroja Sûriyeyek demokratîk, jin diyar bikin.”
