Zanîngeha Kobanê şahiya derçûna 316 xwendekaran, bi dirûşma “Zanîn xwebûn e, xwebûn hebûn e” li Stadyuma Şehîd Bawer Agir a bajarê Kobanê li dar xist.
Xwenedekar destpêkê çûn Pakrawangeha Şehîd Dicle, li wir deqeyek rêz hat girtin û her xwendekarek li kêlek gora şehîdekî/ê sekinî. Piştre xwendekaran berê xwe da Stadyuma Şehîd Bewer Agir a bajarê Kobanê û li wir şahiya derçûnê dest pê kir.
Di şahiyê de bi hezaran şêniyên kantona Firatê, endamên saziyên Rêveberiya Xweser, rêxistinên jin, xwendekar û mamoste amade bûn.
Şahî bi axaftina hevserokên Zanîngeha Kobanê Şervan Mislim û Xezne Îbrahîm hate vekirin. Hevserokan diyar kir ku ew vê derçûnê diyarî Rêber Apo, cangoriyên azadiyê, hemû gelê azadîxwaz û şeravnên azadiyê pîroz dikin û anîn ziman ku xewn û xeyalên salan pêk hatin ku xwendekar bi zimanê xwe derdiçin. Ew xwendekarên ku îro ji vir derçûn bi aramanca ku di sazî û dezgehên Rêveberiya Xweser de cih bigirin. Heta ku şoreşa azadiyê gihişt vê astê gelek bedel hatin dayîn.
Hevserokê Meclisa Zanîngehên Bakur û Rojhilatê Sûriyeyê Dr. Xelîl Elî anî ziman ku ew bixêrhatina hemû kesên hazir dikin û got: “Tiştên ku em niha li vir dibînin, tiştekî gelekî pîroz e. Em vê derçûnê li her kesî pîroz dikin. Ev derçûna çaremîn e. Em vê derçûnê diyarî hemû malbatên şehîdan û cangoriyên azadiyê dikin. Hêviyên me ji xwendekarên me ew e ku çawa xwedî li axa xwe derketin, divê xwedî li mîrasa azadiyê derkevin. Em vê derçûnê li xwendekaran û malbatên wan pîroz dikin.”
Cîgirê Hevserokatiya Meclisa Rêveber a Rêveberiya Xweser a Bakur û Rojhilatê Sûriyeyê Hesen Koçer da zanîn ku gelê Kobanê di 2014`an de û heta roja îro serkeftinan bi dest dixe û îro jî serkeftina derçûna xwedekaran e û got: “Kobanê di Şoreşa 19`ê Tîrmehê de bi ser kete û di Bendava Tişrînê de bi ser ket û îro bi zanista xwendekaran bi ser dikeve. Îro kêfxweşiyek herî mezin e, kêfxweşiyeke ku me di xewnên xwe de ku em bi zimanê xwe bixwînin e, lê îro ew xewn bûn rastî û em bi wan xewnan re jiyan dikin.”
Hesen Koçer anî ziman ku ew ji bo hemû gelê Sûriyê tevahî têkoşîn dikin û diyar kir ku: “Gelê Kobanê di şerê li dijî DAIŞ`ê de bi serkefte û îro jî va ye di asta xwendinê de jî bi ser keft. Em vê derçûnê li tevahî gelê azadîxwaz û cangoriyên azadiyê û Rêber Abdullah Ocalan pîroz dikin.”
Cîgira Hevserokatiya Meclisa Rêveber a Kantona Firatê Mizgîn Xelîl destnîşan kir ku ev berhemek e ji Şoreşa Rojava ye û wiha pê de çû: “Bi saya berxwedana Şoreşa Rojava me ev roja serkeftinê dît. Ev jî berhemek ji Şoreşa Rojava ye. Divê xwendekarên me bi hemû hêz û vîna herî xurt di kar û xebatên xwe de têkoşîn û berxwedaneke xurt bidin meşandin.”
Mamosteya Ziman û Wejeya Kurdî Leyla Qehro jî anî ziman ku ew bi saya cangoriyên azadiyê û Rêber Apo gihiştin vê astê û got: “Em vê derçûna xwe ya pîroz diyarî Rêber Apo, cangoriyên azadiyê, malbatên şehîdan û hemû gelê azadîxwaz dikin.”
Piştî axaftin bi dawî bûn xwendekaran bawernameyên xwe yên derçûnê ji Zanîngeha Kobanê wergirtin.
Şahiya derçûnê bi staranan bi dawî bû.
