Tevgera Jinên Azad (TJA) di çarçoveya 8’ê Adarê Roja Jinên Kedkar ên Cîhanê de li Wanê bi şîara “Em bi berxwedanê azad dibin, civaka demokratîk dihûnin” şahî lidar xist. Di şahiyê de dovîzên “Şoreşa jinê şoreşa civakê ye”, “Dîroka jinê dîroka berxwedanê ye”, “Bi jiyan jiyan azadî ber bi jiyana komunal ve” û “Bi TJA’yê re ber bi civaka demokratîk ve” hatin hildan. Jinan li cihê şahiyê dirûşmeyên “Jin jiyan azadî”, “Bijî Serok Apo” û “Rojîn Kabaîş serhildana me ye” berz kirin.
Seroka Komeleya Jinan a Rosa Zeynep Sîpçîk axivî û got, “Eger aştiyek çêbibe, divê bi jinan re ev aştî çêbibe. Ji ber ku di vî şerî de herî zêde jin berdêlê didin. Ji bo serketina vê pêvajoyê, aktor jinên Kurd in. Em jî amade ne bi rola xwe rabin. Weke pêdiviya pêvajoyê, ji bo Abdullah Ocalan bikare bi rola xwe rabe, divê bi fîzîkî azad bibe.”
Piştre peyama Înîsiyatîfa Edaletê ya ji bo Rojîn Kabaîş hate xwendin.
Endama Şandeya Îmraliyê Pervîn Bûldan jî ev tişt got, “Jin daxwaza azadî û wekheviyê dikin. Em ê berxwedanê bidomînin heta ku jin bi nasnameya xwe bi rengekî azad bijîn. Pêvajoyek heye û divê em hemû xwedî li vê pêvajoyê derbikevin. Ev wezîfeya me hemûyan e. Qonaxeke nû destpê kir. Ji bo pêvajoya Entegrasyona Demokratîk bi ser bikeve, bi jinan re em ê mil bidin vê pêvajoyê.”
Piştî axaftinê, peyama Rêber Apo ya ji bo 8’ê Adarê bi Kurdî û Tirkî hate xwendin. Piştî peyamê jinan dirûşmeya “Bijî Serok Apo” berz kirin.
Piştî peyamê Koma Sorjiyan derket ser dikê.
