Gelê Ereb û Êzidî yên Şengalê bi pêşengiya Tevgera Azadiya Jinên Êzidî (TAJÊ) û Meclîsa Xweser û demokratîk a Şengalê (MXDŞ) li dijî êrişên çeteyên HTŞ’ê yên bi piştgiriya dewleta Tirk û bi erêkirina hêzên navnetewî meşiyan. Girseya gel a ji her devera Şengalê berê xwe da Sinûnê, destpêkê li ber Şaredariya Gel kombûn û ji wir jî berbi Çerxerêya Mam Zekî ve meşiyan. Girseya gel timî dirûşmên, ji bo piştgiriya taxên Kurdan ên Helebê hatin gotin.
‘EV PLANEKE RÊXISTINKIRÎ YE’
Piştî meşê bi navê TAJÊ û MXDŞ’ê daxuyanî hate dayîn. Pêşî Hevserokê MXDŞ’ê Nayîf Şemo axivî. Şemo têkildarî êrişên li ser taxên Kurdan wiha got: “Ev çend rojin li van her du taxan diqewime tenê operasyonên leşkerî nîn in. Ev planeke rêxistinkirî ya dijî hebûna Kurd û Êzidiyane. Ev plan hewl dide vîna xelkê wir bişkîne û bi darê zorê demografyayê biguhere. Ya li wir tê kirin, binpêkirineke eşkere ya qanûnên navnetewî û miroviye. Her wiha ev li dijî nirxên jiyana hevpare.’’
‘DIXWAZIN KARESATÊN BERÊ DUBARE BIKIN’
Nayîf Şemo da zanîn li Helebê Kurd û Êzidî têne hedef girtin û wiha axaftina xwe berdewam kir: “Êrişên dijî Helebê êrişên dijî Êzidiyan yên li Şengalê tîne bîra mirov. Komkujî, koçberkirin û jenosîd heye. Ev yek dide nîşan ku beşekin ji sûcên ji holê rakirina pêkhateyên resen û dûbarekirina karesatên berê ne.Wek xelkê Şengalê em bang li civaka navdewletî, Neteweyên Yekbûyî û rêxistinên mafên mirovan dikin, ji bo rawestandina van êrişan bilez tevbigerin.“
‘ŞENGAL, ŞÊXMEQSÛD Û EŞREFİYÊ YEK IN‘
Berdevka TAJÊ Riham Hico jî berxwedana hêzên asayîşê û xelkê Şêxmeqsûd û Eşfrefiyê silav kir û vê peyamê da: “Em berxwedana gel û şervanên xwe ku niha li ber xwe didin ji Şengalê silav dikin. Ev şerê hebûn û tunebûnê ye. Ew şerê ku niha li Eşrefiyê tê kirin, planeke ku berê hatiye amadekirin. Dibe ev şer belavê hinek cihên din jî û heta Şengalê jî were. Lewma divê em weke xelkê Şengalê xwedî li van taxan derbikevin. Bi rihê berxwedaniya Arîn û Avesta, wan 5 hevalan bi ruhê xwe yê fedayî li berxwedan û teslîmbûnê qebûl nekirin. Xwedî derketina li van taxan xwedî derketina li mirovahiyê ye. Em ji van Eşrefiyê û Şêxmeqsûd silav dikin. Em dibêjin, Şengal, Rojava, Eşrefiye û Şêx Meqsûd yekin.”
