Gelên Bakur û Rojhilatê Sûriyeyê piştgiriya xwe ji bo berxwedana taxên Şêxmeqsûd û Eşrefiyê didomînin, tevî gulebarana çeteyên Hikûmeta Demkî li ser wan, li deriyê Dêr Hefir israra xwe ya li ser piyan piştrast dikin û teqez dikin ku îradeya wan wê neguhere.
Şandeyek ji herêmên Bakur û Rojhilatê Sûriyeyê yên ku berê xwe dan Helebê, ji bo piştgiriya şêniyên Şêxmeqsûd, hewl da ku bigihîje yek ji bendên kontrolê yên çeteyên Hikûmeta Demkî li bajarê Dêr Hafir, lê çeteyan ew bi giranî kirin armanc û her wiha li bajarê Dêr Hafir û gundewarên wê hatin topbaran kirin.
Welatiya bi navê Xedîce Milî ji bajarê Kobanê, ku yek ji şandeyê bû, got: “Gelê Eşrefiyê û Şêxmeqsûd gelê me ye, em ê wan bi tenê nehêlin. Em ê li hember sûc û kuştinê berdewam bikin ku berevaniya bindestan bikin. Em peyama aştiyê hildigirin. Gelê me bê sûc tê kuştin, piraniya wan zarok û jin in, ew axa xwe diparêzin û ev mafê wan ê rewa ye.”
Welatiya bi navê Xaliya Mihemed, yek ji koçberên ji Efrînê ye, diyar kir ku ev cara 4’emîn e ku ew rastî şer û koçberiya bi darê zorê tên. ne cara yekem e ku taxên Eşrefiye û Şêxmeqsûd dibin armanc, ji ber ku di demên dawî de gelek êriş çêbûne. Ev êriş ne tenê ji aliyê çeteyên Hhikûmeta Demkî ve têne kirin, lê tîmên taybet ên îstîxbarata Tirkiyê û heta çekdarên biyanî jî beşdarî wan dibin.
Her wiha Xaliya anî ziman ku ew hatin ku piştgiriya xwe ji bo berxwedana gelê Şêxmeqsûd û Eşrefiyê û Hêzên Ewlekariya Hundirîn piştrast bikin û ji êrişkaran re dibêjin: “Em gelê Efrîn, Şêxmeqsûd û Eşrefiyê ne, em ê an bi rûmet bijîn an jî li ser axa xwe bi rûmet bimirin.”
Welatiya bi navê Ayet El Hebel ji malbatên şehîdan ên navçeya Tebqayê destnîşan kir ku ew ji herêmên Bakur û Rojhilatê Sûriyeyê hatin Dêre Hefer da ku piştgiriyê bidin vê berxwedana dîrokî û ew ê piştgiriya xwe bidomînin heta ku aramî û aştî ji bo hemû gelên azad pêk were.
Welatî Cuma El Ehmed jî piştrast kir ku ji eniyên şer, ew ji gelê Eşrefiyê û Şêxmeqsûd re dibêjin: “Em bi we re di yek xendeqê de ne. Hûn ew kes in ku pêşerojê çêdikin. Em ê bi berxwedana qehreman û lehengên xwe bi ser bikevin, xwîna şehîdan wê vala neherike, ji ber ku serkeftin wê bi berxwedana me were bidestxistin.”
