Wezareta Parastinê ya Japonyayê diyar kir ku du balafirên bombardûmanê yên Rûs ên Tu-95 di ser Derya Japon bi du balafirên bombardûmanê yên Çînê yên bi tîpa H-6 gihîştin hev û li dora welêt firîneke hevpar kirin. Japonyayê li hemberî vê yekê balafirên xwe yên şer rakir hewayê.
Heman piştî vê yekê Japonya û Dewletên Yekbûyî yên Emerîkayê (DYE) bi beşdariya balafirên bomberdûmanê yên B-52 û jetên şer ên F-35 û F-15 tetbîqateke berfireh kirin.
RAGEŞIYA KILÎDA RADARÊ
Tetbîqat rojek piştî wê yekê hate kirin ku hate ragihandin, balafirên şer ên J-15 ên Çînê li nêzî Okinawayê kilîda radarê avêtiye balafirên Japon.
Washingtonê bûyer bi rengekî tund rexne kir û got, “Tifaqa DYE-Japonyayê ji her demê bêhtir xurt e. Çalakiyên Çînê xizmetê ji aramiya herêmî re nakin.”
Tokyoyê ji ber bûyerê bang li Sefîrê Bilind ê Çînê kir. Pekînê jî îdîa kir ku Japonya “Bê destûr ketiye herêma tetbîqatê ya Çînê.”
TANSIYON BILIND DIBE
Koreya Başûr jî ragihand ku balafirên Çîn û Rûsyayê ketine herêma parastina hewayî ya wan û ji ber vê jî balafirên xwe yên şer rakiriye.
Sekreterê Giştî yê NATO’yê Mark Rutte bûyer weke “cihê fikaran” pênase kir. Çîn û Rûsyayê jî îdîa kirin ku ev yek “tetbîqateke hevpar a bi rêk û pêk e.”
Daxuyaniyên tund ên Japonyayê yên di mijara Taywanê de li hemberî Çînê kir, bû sedema nerazîbûna Pekînê. Rêveberiya Tokyoyê aciz e, ji ber ku piştgiriyeke hîn xurt ji raya giştî ya DYE’yê wernagire.
