Hevserokatiya Partiya Jiyana Azad a Kurdistanê (PJAK) têkildarî êrîşên rejîma Îranê ya li dijî xwepêşanderan ya li Îran û Rojhilatê Kurdistanê daxuyaniyeke nivîskî da.
Daxuyaniya Hevserokatiya PJAK’ê
“Pêla nerazîbûnên gel li seranserê Îran û Rojhilatê Kurdistanê roj bi roj berfirehtir dibe. Îlam û Kirmaşan di berdewamiya şoreşa “Jin, Jiyan, Azadî” de pêşengên Kurdistanê ne û niha mil bi milê Hemedan, Luristan û Bextiyariyê, careke din Zagros veguherandine sembola berxwedana li dijî zilm û dîktatoriyê. Em silavê li biryardarî û vîna gelê xwe yê li van deveran dikin.
EW ŞEHÎDÊN ŞOREŞA RASTÎN A GELÊN ZAGROSÊ NE
Hikûmeta Komara Îslamî wekî berê, bersiva nerazîbûn û serhildanên gel bi gule û zextan dide. Di vê çarçoveyê de, hêzên zordar ên Komara Îslamî li bajarên Kûhdeşt, Ezna, Delfan, Lordegan û Hersînê dest bi kuştina serhildêran kirin û îro jî di kiryareke hovane de, dest bi komkujiya gelê Melikşahî yê parêzgeha Îlamê yê ku rabûye ser pêyan, kirin. Em Partiya Jiyana Azad a Kurdistanê (PJAK), van êrişên dijmirovî û hovane bi tundî şermezar dikin. Em berfirehbûna nerazîbûnên demokratîk û piştevaniya hemû alî ji bo gelê Kirmaşan, Îlam, Luristan, Hemedan û Bextiyariyê yê ku rabûye ser piyan, ji aliyê hemû herêmên Kurdistanê ve gelekî pêwîst dibînin. Şehîdên Melikşahî isbat kirin ku îro Îlam û Kirmaşan dilê lêdêr yê Kurdistanê û pêşengên azadî û demokrasiyê li Îranê ne. Ew şehîdên şoreşa rastîn a gelên Zagrosê ne.
MAFÊ XWEPARASTIN MAFEKE REWA YE
Li hemberî van kuştinên hikûmetî, bêguman em mafê xweparastinê wekî mafekî rewa yê gelê xwe dibînin. Em bawerin ku divê xweparastin bi awayekî rêxistinkirî pêk were daku lêçûnên giran ên mirovî ji bo civaka me bi xwe re neîne. Her wiha divê em hişyar bin ku tiştên di çarçoveya xweparastinê de têne kirin, ji aliyê herikên li benda fersendê û qirêj ve neyên îstismarkirin. Ji ber ku em dizanin hinek herikê li benda fersendê, li pey îstismara siyasî û amûrî ya vê serhildana demokratîk a gelin.
BI RUHÊ YEKÎTIYÊ Û HEVGIRTINÊ LI HEMBERÎ VAN PLAN Û SIYASETÊN QIRÊJ ÊN HIKUMETÊ BISEKININ
Saziyên ewlekarî û zordar ên rêjîmê li herêmên ku xwedî pêkhateya êlî û eşîrî ne, ji nakokiyên civakî û dubendiyê ji bo armancên xwe yên qirêj sûdê werdigirin. Em bang li gelê xwe yê welatparêz dikin ku bi ruhê yekîtiyê û hevgirtinê li hemberî van plan û siyasetên qirêj ên hikûmetî bisekinin û wan pûç bikin. Em bang li wan kesên ku di eniya rêjîmê de ne dikin ku tevlî eniya gel bibin, dest ji dijminatiya bi neteweya xwe re berdin û ji refên rêjîmeke ku ti pêşeroja wê nîne, veqetin.
Bijî serhildana demokratîk a Rojhilatê Kurdistanê û Îranê û Jin, Jiyan, Azadî”
