Meclîsa Partiya Jiyana Azad a Kurdistanê (PJAK), di 43’yemîn salvegera darvekirina 59 ciwanên Mehabadî ya ji aliyê dewleta Îranê ve, daxuyanî da.
PJAK’ê di 43’yemîn salvegera darvekirina hovane ya 59 ciwanên Kurd ên Mehabadê de, şehîdên rêya azadiyê bi rêzdarî bibîr anî û got, bûyera Hezîrana 1983’yan û ragihandina fermî ya darvekirina bikom a wan 59 ciwanan ji aliyê Qeymeqamiya Mehabadê ve, yek ji rûpelên herî bi êş a dîroka Kurdistanê ye.
PJAK’ê diyar kir ku yên hatine darvekirin, piranî xwendekarên dibistana amadeyî bûn û temenê wan di bin 18 saliyê de bû û got, “38 kes ji wan xwendekar bûn. Piraniya van ciwanan di mehên Adar û Nîsana 1983’yan de li ser cadeyên Mehabadê bûn, bi wî awayî hatin girtin û xistin zindanê. 48 kes ji wan di girtîgeha Urmiyeyê de û 11 kes jî di girtîgeha Tewrêzê de hatibûn ragirtin. Tu yek ji van ciwanan bi şêwazekî yasayî û dadperwerane nehatin darizandin, parêzerên wan tune bûn û bêyî tu belgeyeke pêbawer, bi lez rûbirûyê darvekirinê man.
Yekser piştî vî sûcî, rewşa awarte hat ragihandin da ku pêşî li her cûre nerazîbûn û bertekan bê girtin. Tevî vê yekê jî, xwediyên Mehabadê daketin kolanan û bi dengê bilind nerazîbûna xwe nîşan dan, malbatên qurbaniyan jî ji bo şopandina çarenûsa wan ber bi Urmiyeyê ve bi rê ketin. Demek şûnde, hukmê azadkirina hinek ji wan ciwanan ji malbatên wan re hat ragihandin. Ev jî nîşaneya sîstema hov a hikûmetê bû û weke nîşaneke eşkere ya kîndarî û tolgirtina kûr a rejîmê ya li hemberî gelê me bû.
Di heman salê de, li gorî daneyan, 369 Kurd hatin darvekirin û ev pêla darvekirinan di salên paşê de jî berdewam kir. Heta cenazeyên van ciwanan jî radestî malbatên wan nehatin kirin, ev aliyê herî hov û zalimana yê vî sucê bû ku hîn jî birîna wê di dilê dayik û bavên Mehabadî de nû ye.
Armanca Komara Îslamî ew bû ku bi hincetên bêbingeh vîna berxwedanê, nasnameya çandî-siyasî û daxwaza azadiyê ya gelê me tune bike. Lê belê dîrokê nîşan da ku xwîna van ciwanan û bi hezaran şehîdên din, tovê hişyarî û berxwedanê bi kûrahiyeke zêdetir di xaka Kurdistanê de çandiye.
Em weke Meclîsa Partiya Jiyana Azad a Kurdistanê (PJAK), di 43’yemîn salvegerê de, vî sûcê hovane bi tundî şermezar dikin, teqezî li ser mafê gelê Kurd ê ji bo gihîştina azadiyê dikin. Îro piştî derbasbûna salan, pêla darvekirinê ya li dijî Kurdan ji aliyê Komara Îslamî ve berdewam dike, hîn jî dixwazin bi rêya komkujî û darvekirinê pirsgirêkan veşêrin. Hîn jî rêbaza desthilatdariyê ya li hemberî gelê Kurd, rêbaza leşkerî ye. Bêguman ev şêwazê zalimane ya ku bi salane berdewam dike, ber bi têkçûnê ve diçe. Ne darvekirina wan ciwanan azadîxwazî lawaz bû, ne jî bi komkujî û darvekirinên demên dawî azadîxwazî kêm dibe. Karwanê berxwedana gelê Kurd heta gihîştina azadiyê wê berdewam bike. Bîranîna 59 ciwanên Mehabadê û hemû qurbaniyên darvekirinên siyasî, wê zindî û weke çavkaniya îlhamê bimîne û sûcdar wê hesab bidin.”
