Polîsên Tirk piştî pîrozbahiyên Newrozê di serî de li Stenbol û gelek deverên din ên Tirkiye û Kurdistanê, bi ser malan de girtin û gelek kes binçav kirin. Kesên hatin binçavkirin bi “propagandaya rêxistinê” hatin tawanbarkirin.
Polîsên dewleta Tirk piştî pîrozbahiyên Newrozê li gelek bajarên Kurdistan û Tirkiyeyê bi ser malan de girtin û zêdetirî 100 kes binçav kirin. Serdegirtin û binçavkirin piştî nûçeyên provokatîf ên medyaya dîjîtal li ser hilgirtina wêneyên Rêber Apo û gerîlayên şehîd, bi tawanbariya “propagandaya rêxistinê” hatin kirin.
DI SERDEGIRTINA MALAN DE ÊŞKENCE HAT KIRIN
Di serdegirtinên li Stenbolê de di nava wan de zarok jî hene 38 kes bi êşkenceyê hatin binçavkirin. Di serdegirtinên ku Polîsên Tevgera Taybet tê de bûn de, çek li welatiyan hat kişandin, gef li wan xwarin û mal serobino kirin.
Di dîmenên ku gihîşt ber ajansa me de malbatek ku bi ser mala wan de hatiye girtin diyar dike ku zarokê wan ji ber beşdarî pîrozbahiya Newrozê nbêye hewl didin binçav bikin. Malbatê anî ziman ku polîsên ku ketin hundir çek li wan û zarokê wan ê biçûk kişandine, gef li wan xwarine û eşyayên wan serobino kirine.
Di serdegirtineke din de, polîsan êşkence li N.E. yê ku temenê wî di bin 19 salî de ye, kir. N.E. ku ji ber êşkenceyê serê xwe birîndar bû, ji aliyê dozgeriyê ve hat berdan.
