Traverso peyamek ji Partiya Demokrasî û Wekheviyê ya Gelan (DEM Partî) re şand û destnîşan kir ku meseleya neteweyî ya Kurd ketiye ‘zivrînekeke dîrokî’ û bang li çep a cîhanê kir ku xwedî li vê veguherînê derkeve.
Nirxandina Traverso bi vî rengî ye:
“Meseleya neteweyî ya Kurd ketiye zivrîneke dîrokî. PKK’ê biryar da ku dest ji têkoşîna çekdarî berde, xwe fesix bike, veguhere avaniyeke ku demokrasiyê diparêze, bi rê û rêbazên aştiyane tevdigere û veguherîna sosyalîst pêk bîne. Ev biryar bêguman tercîheke gelekî zehmet e. Bi dîtina min, divê çep a cîhanê bi rengekî erênî vê veguherîna stratejîk pêşwazî bike û wêrekiya mirovên ku ev biryar dane pîroz bike. Niha demeke nû ya siyasî destpê kiriye. Dibe ku ev pêvajo bi rewşeke nediyar, zor û zehmetî û astengiyên nayên payin dagirtî be. Lê belê ji bo rêveçûnê her tim pêwîstî bi wêrekî û biryardariyê heye.”
ENZO TRAVERSO KÎ YE?
Enzo Traverso ku sala 1957’an li Îtalyayê ji dayik bû, piştî ku ji Zanîngeha Cenovayê mezûn bû, di sala 1989’an de li Parîsê li École des Hautes Études en Sciences Sociales’ (EHESS) doktora xwe kir. Demeke dirêj li Fransayê li zanîngehên cuda dersên li ser zanistiya siyasetê da. Ji sala 2013’an û vir ve jî li Beşa Dîrokê ya Zanîngeha Cornellê ya li DYE’yê profesoriyê dike.
BERHEMÊN WÎ
Traverso bi karên xwe yên li ser dîroka siyasî û entellektuel a Ewropa ya sed salî tê naskirin. Çend ji berhemên wî yên naskirî jî bi vî rengî ne:
Marksîst û Pirsgirêka Yahûdî
Agir û Xwîn: Şerê navxweyî yê Ewropayê 1914-1945
Dîrok weke qada şer: Şîrovekirina zordariya sedsala 20’an
Dawiya Modernîteya Yahûdî: Dîroka Werçerxeke Muxafazakar
Rexnekirina Barbariya Modern
Şoreş: Dîrokeke Entellektuelê
Melankoliya Çep: Marksîzm, Dîrok û Hiş
Rêbera Bikaranîna Rabirdûyê: Dîrok, Hiş, Polîtîka
Çavkaniyên Tundiya Nazî
