Platforma Saziyên Demokratîk a Stenbolê êrişên li ser Rojavayê yên ji aliyê HTŞ, DAÎŞ û komên paramîlîter ên ku ji aliyê Tirkiyeyê ve tên piştgirîkirin, li Taxa Gaziyê ya navçeya Sultangaziyê protesto kir. Di çalakiyê de ku li ber Lîseya Şair Abay Konanbay hat lidarxistin, pankarta bi nivîsa “Dîsa û dîsa Rojava, dîsa û dîsa Serhildan” hat vekirin û her wiha dirûşmeyên wekî “Bijî berxwedana Rojava”, “Hezar silav ji bo kesên ku li Rojavayê şer dkin, “Jin, jiyan, azadî” û “Rojava rûmeta me ye” hatin berzkirin. Di çalakiyê de ku di bin dorpêça polîsan de hat lidarxistin, bi stranên berxwedanê bertek li dijî êrişan hatin dayîn.
Rêvebera Partiya Şoreşger Medîha Yûkselê ku di daxuyaniyê de axivî, diyar kir ku HTŞ berdewama DAIŞ’ê ye û got: “Ev cîhadîst êrişî mirovan dikin û diqîrin û dibêjin ‘Allahû Ekber’. Endamên DAIŞ’ê yên ku duh ji aliyê HTŞ’ê ve hatin berdan ji bo tevahiya cîhanê gef in. Divê gelên tevahiya cîhanê li dijî vê yekê rawestin. Divê bi tevahî li dijî cîhadîstan serhildan bilind bibe. Gelê Kurd li çaraliyê cîhanê ji bo Rojavayê li kolanan e. Çavên enternasyonalîstan jî li ser Rojavayê ne. Me ev berê li Kobanê dît. Wekî sosyalîstên Tirk, divê em li kêleka gelê Kurd bisekinin. Dê Rojava neyê xerakirin, Kobanê rûmeta me ye.”
‘EM Ê LI KUÇEYAN BIN’
Hevseroka Partiya Wekhevî û Demokrasiyê ya Gelan (DEM Partî) ya Stenbolê Arîfe Çinarê, got: “Em ê li kolan bin. Em ê li her bajarekî Tirkiye û Kurdistanê li ber xwe bidin. Niha em dorpêçkirî ne. Ev tê vê wateyê ku li vir zîhniyeteke DAIŞ’ê heye. Em ji bo çawaniya jiyana bi hev re ya mirov û jinan têdikoşin. Hûn dikarin me li vir dorpêç bikin, lê mirovên ku duh ber bi Nisêbînê ve meşiyan sînor şikandin. Zîhniyeteke yekreng heye ku van sînoran xêz dike. Ma zîhniyeteke wisa dikare hebe? Em Kurd in. Em dizanin çawa li ser axa Tirkiyeyê bi gel re wekhev bijîn. Lê nexşeya desthilatê tune. Hûn her tim êrişî Kurdan dikin.”
Piştî daxuyaniyê, girse li kuçeyan belav bû û bi dirûşmeyan li dijî êrişan nerazîbûn nîşan da.
Li gorî agahiyan, nêzîkî 20 kes di daxuyaniyê de hatine binçavkirin.
MÊRSÎN
Platforma Saziyên Demokratîk a Mêrsînê li Taxa Şahîn Tepe ya navçeya Yenîşehîr a Mêrsînê bi gelek welatiyan re civiya. Tevî dorpêça polîsan jî, girseyê gelek caran dirûşmeyên wekî “Bijî berxwedana Rojava”, “YPG gel e, gel li vir e” û “Rojava dê bibe goristana DAIŞ’ê” berz kirin û her wiha sirûda “Ey Raqîp” jî hat gotin.
Hevseroka DEM Partiyê ya Mêrsînê Bedriye Kûş li vir daxuyaniyek kurt da û got ku gelê bi rûmet mafê xwe yê xwepêşandanê bi piştgiriya gelê xwe bi kar tîne. Bediye Kûşê li hember kiryarên polîsan bertek nîşan da û got: “Barîkatên ku polîs niha danîne, diviyabû li dijî DAIŞ’ê bihata danîn. Em careke din hêzên dewletê û walî şermezar dikin. Astengkirina we dê nebe asteng ji bo piştgiriya me bi gelê Rojavayê re. Em ê heta ku çeteyên DAIŞ’ê ji Rojavayê derkevin li ber xwe bidin û piştgiriyê bidin hev. Silav ji gelê Kurd ê li Rojavayê li ber xwe dide.”
ANTALYA
Hêzên Ked û Demokrasiyê yên Antalyayê bi daxuyaniyekê li Meydana Attalos a bajêr êriş protesto kirin. Hevserokê DEM Partiyê yê Antalyayê Selamî Ozyaşar ku di çalakiyê de axivî, got: “Ew kesên ku bi sedsalan e qet dev ji axaftina ‘biratiyê’ bernedane lê qet xem nexwarine ku Kurdan fam bikin an jî guh bidin wan, bê guman me hêvî nedikir ku hûn dev ji gotinên xwe yên nijadperest û faşîst berdin. Lê vê yekê bizanin: hûn ne tevahiya vî welatî ne. Bi îtîfaqên tarî yên ku we bi tevlîkirina medyayê û hemî saziyan li pişt xwe ava kirine, hûn ê tu carî nikaribin têkoşîna ji bo demokrasî û mafên Kurdan û hemû gel û baweriyan asteng bikin.”
Hevseroka DEM Partiyê ya Antalyayê Vahîde Doganê jî bang li hemû hêzên şoreşger, demokratîk û aştîxwaz ên li Tirkiyeyê kir ku mil bi mil li kêleka gelê Kurd bisekinin û gelên Rojhilata Navîn û cîhanê vexwend ku li dijî planên emperyal aştî, wekhevî û azadiyê biparêzin.
