Berdevkê fermî yê Hêzên Sûriya Demokratîk (QSD) Ebcer Dawûd li ser navê Fermandariya Giştî ya QSD’ê der barê têkoşîna li dijî çeteyên DAÎŞ’ê ya li Bakur û Rojhilatê Sûriyeyê de daxuyaniyek xwend.
Di daxuyaniya berdevkê fermî yê QSD’ê ya li bajarê Hesekê de, wiha hate gotin:
“Ji destpêka krîza Sûriyeyê ya 2011’an ve û dûre valahiya ewlehiyê, rêxistinên tundraw berfireh bûn, di serî de rêxistina DAÎŞ’ê ya terorîst. Van rêxistinan ev valahî kir firsend û li dijî hebûna gelên herêmê gefek çêkir, qetilkirin, wêrankirin û koçberkirin pêk anîn û veguherî xetereyeke cîhanî, sînorê Sûriyeyê û herêmê derbas kir.
Ji bo rûbirûbûna vê gefê, QSD’ê bi hevkariya aktîf a Koalîsyona Navneteweyî yek ji şerê serdemê yê herî dijwar li dijî terorê da meşandin. Ji şerê Kobanê ku nuqteya veguherînê çêkiriye ve, heta bi rizgarkirina Reqayê qaşo “paytexta xîlafetê” ya îdiakirî, heta bi şerê Baxozê ku baregeha dawîn a terorê bû û dûre operasyonên berdewam ên li Dêrazor, Hesekê û tevahî herêmên Bakur û Rojhilatê Sûriyeyê şervanên me vîna xurt û şiyana profesyonel a bilind îsbat kir. Sazûmaniya rêxistinê ya DAÎŞ’ê têk bir, piranî cihên lê xurt ziwa kirin.
Ruxmî zirarên mezin ên pê bûne jî hîna DAÎŞ hewl dide xwe ji nû ve bi rêxistin bike. Di vê yekê de sûdê ji rewşa aloz a li gelek herêmên Sûriyeyê, ji hin jîngehên nearam ên li derveyî herêmên di bin kontrola me de, sûdê werdigire. Lê operasyonên ewlehî û leşkerî yên hêzên me yên bi hevkariya Koalîsyona Navneteweyî nehişt ew careke din xwe xurt bike, bi dehan hewlên wan ên têkbirina ewlehî û îstîqrara gelên me bi bin xistin.
Di heyama piştî hilweşîna rejîma Baasê ya Şamê de anku ji 8’ê Kanûna 2024’an heta bi 20’ê Îlonê, şaneyên rêxistinê 153 caran li dijî herêmên Bakur û Rojhilatê Sûriyeyê êriş pêk anîne. Ew hejmar nîşan dide ew xwe jinûve bi rêxistin dike û çarçoveya êrişên xwe berfireh dike.
Ji dema têkbirina “xîlafetê” di şerê Baxozê yê 2019’an de, awayê çalakiya DAÎŞ’ê ji “rêxistina dewletê” veguherî torên şane û komên şerê çetetiyê. Bi wê re êrişên xwecihî, sûîqastkirin û çalakiyên tevlêkirinê yên veşartî zêde bûn. Ev guhertin di hejmara bûyeran de diyar bû. Piştî hejmara êrişan di 2020 û 2024’an de kêm bû, di 2025ˋan de êrişên terorane zêde bûn.
Bi hevkariya berdewam a bi Koalîsyona Navneteweyî re û bi piştevaniya hêzên me re, hêzên me di 10 mehên borî de rêzeêrişên meydanî û pêşîn kirin, şane bê bandor kirin, bi dehan tawanbar girtin, bi dehan planên êrişkirinê têk birin. Bi wê re şiyana rêxistinê ya pêkanîna êrişên mezin hatin sînordarkirin.
Weke bîlanço, hêzên me bi hemû teşkîlatên xwe yên leşkerî bi piştevaniya Koalîsyona Navneteweyî 70 operasyon, (3 jê operasyon paqijkirinê) yên berfireh pêk anîn. Di encamê de, jê 3 serçete, 95 terorîst hatin girtin. Di operasyon de jê 2 serçete, 6 terorîst hatin kuştin. Mîqdareke mezin a çek, cebilxane û belge hatin desteserkirin.
Di êrişên DAÎŞ’ê de 30 şervanên me şehîd bûn, 12 jî birîndar bûn, 6 sivîl jî şehîd bûn.
Li ser wê bingehê, em QSD van xalên li jêr diyar dikin:
1- Berdewama şerê dijî DAÎŞ’ê: Xetereya rêxistinê hîna bi dawî nebûye, hîna ew li ser astên xwecih û navneteweyî gefeke cidî ye.
2- Girîngiya hevkariya navneteweyî: Hevkariya bi Koalîsyona Navneteweyî re hêmaneke krîtîk di pêşîgirtina vegera DAÎŞ’ê de ye û em daxwaza piştgiriya operasyon û lojîstîk a zêde dixwazin.
Aramî û tamîrkirin: Têkoşîna lli dijî terorê ji bilî projeyên geşepêdanê û xizmetguzariyê ku hêviyê ji gelên herêmên rizgarkirî re vedigerîne û rê li ber fikra tundraw bigire, temam nabe. Ev yek jî bêyî piştgiriya navneteweyî ya sabit û demdirêj pêk nayê, ji ber ku rewşa herêmê ya ji ber krîza Sûriyeyê ya berdewam zehmet e.
Ji nîşaneyên dawîn diyar dibe ku DAÎŞ hîna jî hêzek e ku dikare bi êrişên bêserûber û planên girêk zirarê bide, di heman demê de li herêma me hejmareke mezin ji endamên DAÎŞ’ê yên girtî û malbatên wan hene. Li ser vê bingehê, hewcedarî bi zexta operasyonelî ya berdewam û hevkariya navneteweyî ji bo çareserkirina vê şerî bi awayekî lezgîn heye.
Di dawiyê de, em bejna xwe li hember şehîdên di oxira parastina xaka Bakur û Rojhilatê Sûriyeyê de daye ditewînin, soza xwe ya berdewamkirina têkoşîna li dijî terorê heta têkbirina wê û misogerkirina siberojeke ewle û aramtir dubare dikin.”
