Navenda Ragihandinê ya Hêzên Sûriyeya Demokratîk (QSD), bi boneya salvegera damezrandina xwe ya dehemîn de daxuyaniyek weşand. Daxuyanî wiha ye:
“Bi boneya salvegera dehemîn a damezirandina hêzên me, Hêzên Sûriyeya Demokratîk (QSD), em bi navê Fermandariya Giştî bi serbilindî hemû qehreman û lehengên QSD`ê, gelê me yê li Bakur û Rojhilatê Sûriyeyê û li seranserê Sûriyeyê silav dikin ku bi hev re bingeha vê projeya neteweyî ya berfireh ava kir. Ev proje ji îradeya gel û baweriya wan bi mafê wan ê jiyaneke azad û birûmet derket holê.
Hêzên me li ser mîrate û fedakariya Yekîneyên Parastina Gel (YPG) û Yekîneyên Parastina Jin (YPJ) di demên herî tarî yên dîroka Sûriyeyê de hatin damezirandin. Di wê demê de li deverê tevlihevî serdest bû, enî hilweşiyan û terorîzm li deverên berfireh ên welêt belav bû. Hêzên me di demên tevliheviyê de dengê aqil, di demên parçebûnê de projeya yekitiyê û li dijî terorîzm û tundrawiyê keleha rûmetê bûn.
Di demekê de ku gelek hêz ketin nav şerê navxweyî, Hêzên Sûriyeya Demokratîk rêyeke cuda hilbijart; rêya parastina welat û mirovan. Wan ala xwe ji bo berjewendiyên teng bilind nekirin û îspat kir ku ew hêzek neteweyî ne, li ser axa Sûriyeyê û ji hemû pêkhateyên wê hatiye avakirin, bi navê gelê Sûriyeyê û ji bo wî şer dikin.
Di nava 10 salan de Hêzên Sûriyeya Demokratîk qurbaniyên mezin dane, bi hezaran şervanên ku gund ji pencên DAIŞ`ê rizgar û bi mîlyonan sivîl ji qirkirin û koçberiyê parastine, kirine şehîd bûn. QSD di çeperan de ji bo parastina yekiriya Sûriyeyê şer kiriye, li cihê ku mirin hebû ewlehî pêk anî û li cihê ku terorîzmê wêranî dikir, jiyan ava kir.
Şerên hêzên me li dijî terorîzmê ne tenê pevçûnên leşkerî bûn, lê ew şerekî hebûn, rûmet û exlaqê neteweyî bûn. QSD`ê ji bo parastina hemû mirovahiyê şer kir, berpirsiyariya parastina Sûriyeyê ji hilweşîn û parçebûnê hilgirtin ser xwe û ji cîhanê re îspat kir ku îradeya gelê azad dikare li dijî tariyê bi ser bikeve.
Bi projeya xwe ya neteweyî û demokratîk, QSD`ê modeleke bêhempa ya rêveberiya xweser û rêveberiya sivîl ava kir, li ser bingeha azadî, wekhevî, edaleta civakî û beşdariya hemû pêkhateyan. Ev proje ne alternatîfek ji bo Sûriyeyê bû, lê rêyek ber bi Sûriyeyek demokratîk ve bû, Sûriyekeke azad bê zordarî û terorîzm.
Îro, QSD li Bakur û Rojhilatê Sûriyeyê bûye stûneke aramiyê û ewlehiyê û bûye hevkarê bibandor di nava hewldanên navneteweyî yên ji bo şerê li dijî terorîzmê de, her wiha bûye hêzeke siyasî û leşkerî ya berpirsyar ku hem li hundir û hem jî li derve cihê rêzgirtinê ye. Hebûna QSD`ê ya çalak li hemû qadan de, bûye egera parastina destkeftiyên gelên Sûriyeyê li dijî hemû hewldanên parçekirinê.
Bi vê boneya dîrokî, em şehîdên xwe yên ku bi xwîna xwe destana azadiyê nivîsandin bi bîr tînin û em soza xwe ji wan û gelê xwe re dubare dikin ku Hêzên Sûriyeya Demokratîk dê girêdayî regezên ku li ser wan hatine damezirandin be, regezên parastina gel, parastina rûmeta welat û berdewamkirina têkoşînê heta ku em Sûriyeyeke azad, demokratîk û ewle ji bo hemû gelên wê ava bikin.”
