Piştî Cîgirê Serokê Hikûmeta Herêma Kurdistanê Qubad Talebanî û Endamê Mekteba Siyasî ya YNK’ê Derbaz Kusret Resûl îro li Enqereyê bi Wezîrê Karên Derve yê Tirkiyeyê Hakan Fîdan re civiyan, Qubad Talebanî têkildarî hevdîtinê daxuyaniyek weşand.
Di daxuyaniyê de wiha hate gotin; “Di civînê de, me amadebûna Herêma Kurdistanê û YNK’ê ji bo her cûre piştgiriyê ji bo serkeftina pêvajoya aştiyê anî ziman û hêvî kir ku ev qonaxa nû têkiliyên di navbera Tirkiye û Herêma Kurdistanê de xurtir bike ku bi taybetî jî parêzgeha Silêmaniyê di warên bazirganî, veberhênan, xwendina bilind û geştiyariyê de.
Pêvajoya aştiyê li Tirkiyeyê pêvajoyeke girîng û dîrokî ye û em bi baweriyeke mezin û hêviyeke mezin lê dinêrin. Ez kêfxweşim ku hikûmeta Tirkiyeyê û partiyên wê ji bo serkeftina pêvajoyê pabendin. Derbarê rewşa herêmê de, me helwesta xwe ya neguher tekez kir ku emê nebin beşek ji pevçûn û aloziyan. Di şûna wê de, emê bi hevkarên xwe re bixebitin da ku aştî û aramiya herêmê biparêzin.
Derbarê mijara avakirina Hikûmeta Herêma Kurdistanê de, me tekez kir ku divê alî rewşa nû ya li herêmê, Iraq û Kurdistanê li ber çavan bigirin, da ku avakirina hikûmeteke nû bilez bixin. YNK amade ye ku beşdarî hikûmeteke li ser bingeha şirîkatiyeke rastîn bibe.
