Li goristana Dêbine bi amadebûna kesûkarên Enfalkiriyan, bi boneya 38’emîn salvegera Enfalê tacegul hatin danîn û qurbaniyên Enfalê hatin bîranîn.
Rejîma Baasê di dewama Enfala Helebceyê de, roja 14’yê Nîsanê qonaxa sêyem ya Enfalê destpê kir. Bi ser vê roja bi xwîn re 38 sal derbaz dibin. Bi boneya salvegera Enfalê, li goristana Dêbine ya li bajarokê Rizgarî ya ser bi îdareya Germiyanê, bi amadebûna kesûkarên Enfalkiriyan, parî û aliyên siyasî tacegul (çelenk) hatin danîn.
Ji ber rewşa aloz ya herêmê, ti merasîmek fermî nehate lidarxistin. Lê kesûkarên Enfalkiriyan û berpirsên partî û hikûmetê tenê bi danîna tacegulan salvegera Enfalê û qurbaniyên Enfalê bîranîn. Di merasîmê de kesûkarên Enfalê banga vegerandina cenazeyên Enfalkiriyan kirin.
Berpirsê îdareya Germiyanê Celal Şêx Nûrî li merasîmê ji çapemeniyê re axivî û got: “Beryia 38 salan partiya Baas’ê kesûkarên me Enfal kir. Di vê salvegerê de em bang li hikûmeta Herêmê û Iraqê dikin, tazmînata madî û manewî bidin kesûkarên Enfalkiriyan. Em wek îdareya Germiyanê ji bo vegerandina cenazeyan û lêgerîna gorên bi komî, piştevaniya hemû kesûkarên Enfalkiriyan dikin. Em daxwaz dikin ku doza Enfalê li hemû cîhanê wek jenosîd were naskirin.”
Her wiha li ber peykerê Enfalê yê li nav Bîrdariya Şehîdên Helebceyê, ji aliyê Waliya Helebceyê û alî û berpirsên hikûmet û partiyan, bi boneya salvegera Enfalê tacegul hate danîn.
Rêveberê Giştî yê Rêveberiya Şehîdan û Enfalkiriyan ya Helebceyê Kameran Mistefa ji Rojnews’ê re axivî û got: “Hemû şehîdên Kurdistanê û şehîdên Enfalê bi rêzdarî bibîrtînin. Helebce jî wek gelek deverên din ên Kurdistanê li ber pêla Enfalê ket. Di vê pêla Enfalê de 150 kes hatin qetilkirin, di qonaxa heştemîn de jî zêdetirî 100 welatî şehîd bûn. Lê heta niha hestiyên Enfalkiriyên Helebceyê nehatine vegerandin ku hîna li Nugre Selman, Erer û Topzawane. Em daxwaz dikin ku xebat û proseyên ji bo vegerandina hestiyên heskiriyên me, bilezînin.”
Celal Şêx Nûrî diyar kir ku niha projeyek ya Bîrdariya Enfalê ber bi temambûnê ve diçe û destnîşan kir ku wan xizmetgûzariya gundên ku ber pêla Enfalê ketine dabînkirine.
