Li mala sazîya gelên Krasnodarê, di 3 Tebaxê 11’emîn salvegera fermana li ser gelê Êzîdî ya Şengalê de civînek hate lidarxistin. Civîn ser rihê cangoriyan û qurbanîyên fermanê bi deqeyek rêzgirtina destpê kir.
Hevserokê Otonomîya netewî ya kurdên Krasnodarê Arif Ezmanî civîn bi rêve bir û li ser fermanên ku çêbûne axivî û got: “li ser fermana ku anîn ser gelê me yê Şengalê 11 sal derbas bû. Bi destê DAÎŞ’ê ku bi destê dewletên mezin hatibû çêkirin ev qirkirin pêk hat. Ew rêxistin bi serê xwe çênebû, bi destê wê rêxistinê armanca dewletên mezin çiye, nû ve dizaynkirina nexşeya Rojhilata navîn armanc kirin. Dewletên heyî wê xirabibin û dewletên nû wê çêbibûna. Heya roja îro jî ew DAÎŞ’ê ku tê bikaranîn destpêkê êrîşî Şengalê kir û qirkirin ser civaka me ya Êzîdî pêk anî.
Ezmanî axaftina xwe wiha domand: “bi hezaran Êzîdî hatin qetilkirin, bi hezaran jin li kolanan hatin firotin. Di sedsala 21’emîn de li bazaran mirov hatin firotin. Bi rastî jî ew rûreşîya cihanê bû. Heya niha di destê DAÎŞ’ê hîna zêdetirî 3500 Êzîdî hene. Ji ber ku Êzîdî bê tevger û bê rêxistin bûn, bê parastin man û ev ferman çêbû. Ji însafa malbata Barzanî re hatibûn hîştin û PDK’ê ye ku bûbû hevkarê dewleta Tirk û DAÎŞ’ê bû hevkarê vê fermanê. Talîmat dan û 12 hezar Pêşmêrge ji Şengalê vekişiyan. Ji bo wê jî ev ferman pêk hat.
Arif wiha axaftina xwe bi dawî kir: “Piştre me dît ku kî/ê xwedî li Êzîdiyan derket. Gerîlayên Azadiya Kurdistanê bi talîmata Rêber Apo li Êzîdiyan xwedî derketin. Ji bo rizgar kirina gelê me yên Êzîdî nezî 400 cangorî şehîd bûn. YPG-YPJ’ê yên Rojavayê Kurdistanê hatin şer kirin û gelê me xilas kirin. Ji bo wê jî em tim û tim dibêjin û em ê bêjin gelê me yê Êzîdî heya hebin pêwîste bizanibin rêjên teng de kê xwedî li wan derket!”
Piştre hevserokê Otonomîya Kurdên Rûsyayê Ferhat Patîyêv axivî û got: “hemû fermanên li ser gelên me yên Êzîdî bi planên dijî Kurdan vekirî û veşertî hatine meşandin û komkujî pêk anîne. Heya roja îro jî dixwazin wan komkujiyên xwe berdewam bikin. Gelê Dûrzî û Elewî jî bi komkujiyan re rû bi rû hiştin. DAÎŞA ku bi destê cîhanê hate çêkirin, li hemû deveran belav kirin û xistin belayê serê gelan. Îro jî ciwanên ku wek çanda xwe dûr, bê zanist dikevin bin bandora şekil û şemalê wan. Ev şermeke mezine. Di warê çandî de mirov pêwîste bizanibe kî ye û ji kur hatiye. Îro em dibînin ku piranîya ciwanan rûyê xwe berdidin û simbêlên xwe jêdikin. Ev di çanda Kurdî de tune ye. Pêwîste ciwan rê nedin bişavtinê. Ji ber vê ji bo gelê Kurd azad be û bigihêja mafê xwe, li derdora Rêbertîya rast a ku îro xwe bi her alî îspatkirîye û bingeha bîrdoziya mirovahî danîye, bibin xelek û xwe birêxistin bikin.”
Di civînê de Rizayê Cemal jî axivî û di axaftina xwe de got: “Dermanê çareserîyê û dawî li êşan anîn, xwe zane kirinê de ye. Îro bingeha wê hatîye avêtin. Ew bingeh xeta Rêber Apo ye. Ji vir û şûnde tu dewlet an jî rêxistinên wek DAÎŞ’ê wê nikaribin komkujî li ser gelê me bînin.”
Her wiha koma rûspîyê Kurdên Krasnodarê Îşxanê Anqosî û Qadirê Cindî jî axivîn. Herdû rûspî jî dîyarkirin ku perçebûna gel tim bûye sedema neyaran ku bi me bilîzin û bi hêsanî planên xwe serbixin. Ji ber vê lazim e tevahî gelê Kurd bêyî ku cudatî bixe navbera xwe, bi remanê netewî rabe ser xwe û yekêtîya xwe xurt bike. Divê em jî hember dijminan bi xurtî rewastin.
Civîn bi dirûşmeya, “şehîd namirin” bidawî bû.
