Di Civata Giştî ya Kongreya Neteweyî ya Kurdistanê (KNK) a 24’emîn de ku li bajarê Venlo yê Hollandayê di 6-7’ê Hezîranê de hate lidarxistin, li ser bûyerên dawî yên li Rojhilata Navîn, êrîşên li ser Rojava û Başûrê Kurdistan û rewşa Rojhilat û Bakurê Kurdistanê nirxandin hate kirin. Her wiha ji bo qonaxa nû, li ser stratejiyên siyasî ya ji bo yekîtiya neteweyî ya Kurdan hat nîqaşkirin. Hevserokê Giştî yê KONGRA- GEL Remzî Kartal têkildarî Civata Giştî ya KNK’ê axivî û got, civîn ne tenê xebateke sazûmanî ya rûtîn bû, di heman demê de ji bo siyaseta Kurd xaleke werçerxê ya dîrokî bû.
‘PEYAMA GEL DERBASÎ PÊŞIYA AKTORÊN SIYASÎ BÛ’
Remzî Kartal diyar kir ku KNK’ê 27 sal in ji bo yekîtiya neteweyî ya Kurd xebatê dimeşîne, lê hîn jî asta hevkariya xwestî di navbera partiyên siyasî de nehatiye bidestxistin. Kartal, destnîşan kir ku gelê Kurd, bi taybetî di êrîşên dawî yên li ser Rojava de, hevgirtinek xurt nîşan daye û ev yek rê li ber pêvajoyek nû vekiriye. Kartal got, “Van êrîşan Kurd nêzîkî hev kirine.”
Remzî Kartal da xuyakirin ku Kurd li her çar perçeyên Kurdistanê û li dîasporayê daxwaza xwe ya yekîtiya neteweyî bi rengekî zelal anîne ziman û got, “Gelê me li her derê bi dirûşmeya ‘Yek Yek Yeke Gelê Kurd Yek e’ daxwaza xwe ya yekîtiya neteweyî bi awayekî zelal nîşan da.”Kartal, diyar kir ku ev îradeya civakî ya derketî holê peyamek xurt e ji bo partiyên siyasî û KNK’ê û got ku dê di vî warî de hewldanek nû û berfireh da destpêkirin.
Kartal, da zanîn ku ew armanc dikin heta dawiya salê binesaziya konferansek demokratîk a neteweyî ava bikin û got, “Konferans dê bi tenê bi partiyên siyasî ve sînordar nebe û got ku ew ê akademîsyen, hunermend, rewşenbîr û beşên cûda yên civakê jî di nav xwe de bihewîne.” Kartal, her wiha diyar kir ku armanca sereke ya konferansê “dayîna bersivek şênber ji bo daxwaza yekîtiya neteweyî ya gel e û ji bo avakirina stratejiyek neteweyî ya demokratîk a hevpar de zemînek pêşkêş dike .”
‘PIRSGIRÊKA KURD DI NAVENDA SIYASETA HERÊMÎ DE YE’
Remzî Kartal diyar kir ku pêşketinên siyasî û leşkerî yên li Rojhilata Navîn careke din pirsgirêka Kurd kiriye mijarek girîng di rojeva herêmî û navneteweyî de. Kartal, destnîşan kir ku konferansa demokratîk a neteweyî ya ku tê plankirin dikare bibe destpêka rêbazek nû ya têkoşînê û stratejiyek hevpar ji bo çareserkirina pirsgirêka Kurd.
Kartal bang li hemî partî, sazî û kesên welatparêz kir ku bi hev re bixebitin da ku serkeftina konferansê û siberoja gelê Kurd misoger bikin.
