Navenda Têkiliyên Derve yên Jinên Kurd (REPAK), bi mebesta salvegera 12’an a komkujiya li ser civaka êzîdî ku di 3’yê Tebaxa 2014’an de ji hêla DAÎŞ’ê ve hate kirin, daxuyaniyeke nivîskî weşand.
REPAK’ê di destpêka daxuyaniya xwe de bal kişand ser dîroka kevnar a civaka Êzîdî û destnîşan kir ku gelê Êzîdî bi çand, bîr û baweriya xwe bûye bingeha civakbûna mirovahiyê. Di daxuyaniyê de hate bi bîr xistin ku civakên xwedî nasname di seranserê dîrokê de rastî êrîşên hêzên desthilatdar hatine û Şengal jî yek ji van mînakên herî giran e.
Berdewama daxuyaniya REPAK’ê bi vî rengî ye:
“Di dîroka nêz de hemû mirovahiyê şahidî ji fermaneke din ku bi serê gelê Êzîdî de hat kirin. Di 3’yê Tebaxa 2014’an de DAÎŞ’ê bi hêzeke mezin êrîşeke hovane li ser Şengalê pêk anî. Ev êrîş fermaneke din e ku wekî Fermana 74’an û qirkirina gelê Êzîdî tê zanîn.
Di encama vê ferman û qirkirinê de civaka Êzîdî rastî komkujiyeke ku wê bi tu awayî di hafizeya mirovahiyê de neyê jibîrkirin hat. Ger berxwedana şervanên azadiyê yên Kurd bi pêşengtiya 12 siwariyan pêş neketibûya, wê encama fermanê hîn girantir bibûya.
Di komkujiyê de bi hezaran kes hatin qetilkirin û nêzîkî 6 hezar û 400 jin û zarok hatin revandin, wendakirin, rastî tacîz û destdirêjiyê hatin û bi awayekî sîstematîk rastî tundiyê hatin. Bi sed hezaran kes jî ji cih û warên xwe hatin koçberkirin.”
REPAK’ê, bal kişand ser wê yekê ku tevî dîtina zêdetirî 80 gorên komî, aqûbeta gelek jin û keçên ku wekî kole hatin firotin hîna ne diyar e. REPAK’ê, destnîşan kir ku her çend ev ferman di asta navneteweyî de wekî jenosîd hatibe pejrandin jî, xeteriya li ser gelê Êzîdî bi dawî nebûye û hat gotin ku peymanên mîna ya 9’ê Cotmeha 2020’an rê li ber qirkirinê nagirin.
BANGA HEVGIRTINÊ Û TÊKOŞÎNÊ HAT KIRIN
REPAK’ê, di dawiya daxuyaniya xwe de şehîdên fermanê bi hurmetî bi bîr anîn, êş û birînên gelê Êzîdî parve kirin û bang li raya giştî û hemû jinan kir ku li beramberî îradeya Şengalê berpirsyariya xwe bi cih bînin.
Di daxuyaniyê de hate teqezkirin ku Fermana 74’an rasterast nasname û bedena jinên Êzîdî hedef girtiye û ev peyam hate dan, “Îro têkoşîna ku jinên Êzîdî didin meşandin xwedî cihekî dîrokî û mafdar e. Jinên Êzîdî bi xwe-rêxistinkirinê re teqez wê azadiya xwe û ya gelê xwe mîsoger bikin.”
