Du rayedarên DYE’yî yên navxwe nexwestin eşkere bikin û ji Reutersê re axivîn, anîn ziman ku amadekarî ji bo angajmaneke leşkerî ya demdirêj re tê kirin.
Li gorî nûçeyê, daxuyaniyên rayedaran nîşan dide ku danûstandinên dîplomatîk ên navbera DYE û Îranê di asteke krîtîk de ye. Hefteya derbasbûyî dîplomatên DYE’yî û Îranî ji bo li ser mijara bernameya nukleerê ya Îranê hevdîtinan bikin li Ûmmanê li hev kom bûn. Balkêş bû ku di vê demê de DYE’yê hêzên xwe yên deryayî yên li nêzî Îranê zêde kir.
Li gorî yek ji rayedaran di çarçoveya operasyoneke demdirêj de artêşa DYE’yê ne tenê tesîsên nukleerê her wiha dikare êrişê bibe ser binesaziya saziyên ewlekarî û dewletê yên Îranê.
Pispor hişyariyê didin ku operasyoneke bi vî rengî ji bo leşkerên DYE’yî dikare rîskên cidî bi xwe re bîne. Tê gotin, eger Îran jî bersivê bide operasyona DYE’yê ya gengaz, wê rîska şerekî herêmî zêde bibe.
Heman rayedarî got, rêveberiya Washingtonê li bendê ye ku Îran bersivêb ide û ev yek jî wê bibe sedema êrişên li hemberî hev ên heta demekê.
Qesra Spî û Pentagonê bersiv nedan pirsên li ser rîskên bersivdanê û şerekî gengaz ê herêmî.
Du rayedarên DYE’yî yên ji Reutersê re axivîn anîn ziman ku DYE’yê biryar da ku du keştiyên din ên balafiran bişîne Rojhilata Navîn.
Berdevka Qesra Spî Anna Kelly li ser mijarê daxuyanî da û got, “Serok Trump di mijara Îranê de rêyên heyî hemûyan dinirxîne.”
