Li Girtîgeha Tîpa F a Bolûyê ku bi binpêkirinên mafên mirovan ên li dijî girtiyan di rojevê de ye, eşkere bû ku mafê agahîwergirtinê yê girtiyê siyasî Îhsan Balkaş bi kêfî asteng dike. nameyê ku Balkaş bi zimanê xwe yê dayikê bi Kurdî nivîsandî bi îdîaya ‘nayê fêhmkirin’ ji aliyê rêveberiyê ve nehate şandin. Her wiha rêveberiyê ji bo wergera nameyan pereyê wergerê jê xwest.
PEREYÊ WERGERÊ JI GIRTÎ HATE XWESTIN
Ji parêzerên OHD’ê Berîvan Barin ê bi Îhsan Balkaş re hevdîtin kir, anî ziman ku ya hatiye kirin binpêkirina pîvana wekhevî û mafê agahîwergirtinê ye û ev rewş veguheriye mekanîzmayeke sansurê.
Berîvan Barin destnîşan kir ku ev kiryar binpêkirina mafê mirovan e û got, “Ev rewş mafê agahîwergirtinê yê mehkûman ê bi Kurdî di pratîkê de zehmet dike; mehkûmên ku rewşa wan a aboriyê nîne mafê wan ê agahîwergirtinê ji wan tê wergirtin.”
Berîvan Barin diyar kir ku erka dewletê ya kontrolkirina agahîwergirtinê veguheriye mekanîzmaya sansurê.
Berîvan Barin destnîşan kir ku ne tenê mafê agahî wergirtinê her wiha divê rûmeta mirovahiyê jî bê parastin.
Balkaş ê ku nameyên wî nehate şandin, li Dadgeriya Înfazê ya 2’yemîn a Bolûyê ji ber binpêkirina mafê wî îtiraz kir. Lê belê Dadgeha Cezayê Giran a 1’emîn a Bolûyê ku îtiraz nirxand, hemû serlêdanên têkildarî binpêkirina mafên mirovan red kir. Dadgehê kiryara kêfî weke erka rêveberiyê pênase kir.
Piştî vê biryarê parêzeran serlêdana şexsî li Dadgeha Destûra Bingehîn kirin.
