Li Kobanê dorpêça ku dewam dike ket roja 36’an, çeteyên girêdayî Hikûmeta Demkî ya Sûriyeyê û Tirkiyeyê ji 20’ê Çileyê ve rêyan digirin û li gund û qadên bejahî yên Kobanê heya roja îro gelek sivîl bi hovane qetil kirine.
Ev têrê nekir, ketin malên Kurdên ji cihên xwe hatine kirin, mal û milkên wan bi rengekî sîstematîk hatin talankirin, dizî hate kirin û ev yek hîn jî didomin.
Wêran, talan, revandin û xwestina fîdyeyê ya ji aliyê çeteyên Hikûmeta Demkî ya Sûriyeyê û dewleta Tirk ve tên kirin, dorpêçê hîn girantir dike. Di navîna meha Çileyê de, di rojên herî giran ên zivistanê de ji ber êrîşên çeteyan beşekî mezin ê gel neçar ma koçî Kobanê bike.
Piştî valakirina gundan çeteyên ku ev rewş weke firsend dîtin, ketin cihên niştecihiyê yên Kurdan û eşyayên madî û manewî yên mirovan talan dikin.
Hat zanîn ku bi taybetî panelên enerjiya rokê, kabloyên elektrîkê, dolabên qeşayê, depoyên mazotê, televîzyon, taximên kanepeyan, mînder, makîneya kar a patos, bi wesayît û kamyonên ji Girê Spî, Serêkaniyê û Reqayê yên dagirkirî anîne, hatin dizîn.
Heya îro herêmên ku herî zêde hatine talankirin û wêrankirin, gundên Çelebiye û Sirînê ne.
Hat zanîn ku bi taybetî li van gundan komên çeteyên bi navê Sultan Murad, Hemzat, Emşat, Firqaya 42’yemîn û 72’yemîn ên girêdayî Tirkiyeyê hene, her cure pêkanînên bi zihniyetên talanker û wêranker tên meşandin jî, hate rewşeke welê ku xwe normalîze dike.
Me belge bi dest xistin ku 21’ê Sibatê roja şemiyê çete dikevin herêma Hesen Elî ya girêdayî gundê Xirab Îşkê ya li başûrêrojhilatê Kobanê û malên Kurdên ji cihên xwe hatine kirin, talan û wêran dikin. Derket holê ku çete dikevin malên Kurdan û mal û malzemeyên wan didizin. Ev rewş di dîmenan de jî bi rengekî eşkere tê dîtin. Ji motora klîmayê heya taxima sungerê, ji televîzyonê heya panelên enerjiya rokê li malê çi hebe hatine wêrankirin.
