– Êrîşên çeteyên HTŞ’ê yên hikûmeta demkî ya Sûriyeyê li ser bajarên Rojava û pêşketinên têkildar wê werin şopandin.
– Çalakiyên ku li Kurdistan, Tirkiye û Ewropayê li dijî êrîşên li Rojava hatine kirin wê werin şopandin.
– Siyasetmedara Fransî Geneviève Garrigos bêdengiya civaka navneteweyî li hember êrîşên li ser Rojava wekî xiyanetek eşkere ya li hember Kurdan bi nav kir û got “Ji bo hûn têkevin tevgerê ma divê li Parîsê komkujiyek nû ya cîhadîst çêbibe? Hûn li benda çi ne?”
– Siyasetmedar Îdrîs Balûken diyar kir ku sedema herî mezin a ku di vê pêvajoyê de Rojava bûye hedef ne hêza wê ya leşkerî ye, şêwaza jiyana wê ye û got, “Desthilata Tirkiyeyê ji bo destketiyên demkurt rêyek pir xeternak dişopîne.”
– Hevseroka GOÇ-DERê Medya Alkan diyar kir ku êrîşên li ser Rojava rê li ber pêla koçberiyê vekir û got, “Li herêmê sûcên li dijî mirovahiyê têne kirin. Av û elektrîka kesên ku koçber nabin tê qutkirin. Ev hewldanek e ku avaniya demografiya herêmê were guhertin.”
– Ji Koordînasyona Koçberên Efrîn û Şahbayê Muşîra Mele Reşîd diyar kir ku zêdetirî 3,400 malbat koçî bajarê Qamişloyê kirine û got ku ev malbatên koçber di şert û mercên dijwar de dijîn û heta niha tu alîkarî negihîştiye herêmê.
– Diyar Koç ê ku li Nisêbînê hatibû binçavkirin û îşkencekirin, ji ber zexta polîsan ji nexweşxaneyê hate derxistin. Dema ku di bin çavan de bû polîsan derbarê daxistina alê de pirs jê nekirin. Koç ê ku pirsa “Ma te ala YPG’ê daliqand?” jê pirsîn ne dikare bimeşe û ne jî pêdiviyên xwe pêk bîne.
