Danişîna biryarê ya doza rojnamevan Hakki Boltan li 12’emîn Dadgeha Cezayên Giştî ya Amedê hate lidarxistin. Boltan, ji ber daxuyaniya bi Kurdî ya têkildarî Midûrê Karê Nivîsan ê Rojnameya Azadiya Welat Rohat Aktaş ku di qedexeya derketina kolanan a li Cizîrê de hatibû qetilkirin, bi îdiaya “heqaret li serokkomar kiriye” tê darizandin. Parêzerê Boltan, Resûl Tamur di danişînê de amade bû.
Dozgeriyê mutalaaya xwe ya di danişîna berê de dubare kir û xwest ceza li Boltan were birîn. Parêzer Tamur jî li dijî mutalaayê parastin kir û got ku tev li mutalaayê nabin, miwekîlê wî rojnamevan e û fikrên xwe bi awayekî rexneyî vegotiye û xwest beraet bike.
Dadgehê, piştî parastinê biryara xwe da û salek û 2 meh û 17 roj cezayê girtîgehê da Boltan. Boltan wê li dijî biryarê, bi rêya parêzerê xwe serî li Dadgeha Îstînafê bide.
Her wiha danişîna doza Boltan a ji ber Weşanxaneya Aramê ku bi îdiaya “propagandaya rêxistinê” hatiye vekirin hat lidarxistin.
Dozgeriyê di danişînê de ji bo amadekirina mutalaayê dem xwest.
Dadgehê ev daxwaz qebûl kir û danişîn taloqî 16’ê Tîrmehê kir.
