Ji Rêveberiya bajarê Kobanê Rûken Ehmed têkildarî şehadeta Endamê Desteya Hevserokatiya Partiya Yekîtiya Demokratîk (PYD) Salih Muslim ji ANF`ê re axivî û got ku ew ê mîrateya Salih Muslim bigihînin serkeftinê.
ŞOREŞGERÊ WELATÊ XWE BÛ
Rûken Ehmed di destpêka axaftina xwe de ji malbat, hevrê û ji tevahiya gelê Kurd yên li her çar parçeyên Kurdistanê re sersaxî xwest û ev yek anîn ziman: “Wê rêya hevrê Salih Muslim bê şopandin. Ew bavê zarokan bû, lê belê ew wekî şoreşgerekî siyasî, diplomasî û rêxistinî bû û xwe wekî şoreşgerekî welatê xwe didît. Li ku derê zehmetî hebûya, hevrê Salih Muslim li wir bû. Bêyî teredut girêdayî doza Kurd û gelan bû. Ew bi Netewa Demokratîk, bi yekîtiya gelê Kurd heta dawiyê jî bawer bû. Li ser esasê bîr û baweriyê xebat dan meşandin.”
DI AVAKIRINA YEKÎTIYA GELÊ KURD DE XWEDAN ROL BÛ
Rûken Ehmed piştre destnîşan kir ku Salih Muslim bi dilnizmiya xwe ya bi zarokan re bi rihê zarokatiyê û bi kesên mezin re têkildar bû û bi wî ruhî heta dawiyê tev digeriya û got: “Ew bi keda xwe di nava civakê de xwediyê giraniyekî bû, dema ku kesek bi doza xwe îkna be, wê demê ew ji aliyê civakê ve her tim tê hezkirin, Salih Muslim her tim rêya têkoşînê hilbijart. Di rêbaza wî de îknakirin, bîr û bawerî hebûn. Heta di avakirina yekîtiya gelê Kurd da roleke xwe ya gelekî mezin hebû. Ji bo ku em doza hevrê Salih bişopînin divê em berî her tiştî berê xwe bidin yekîtiya gelê Kurd. Ji ber ku a niha êrîşeke qirkirinê li ser neteweya Kurd heye, ji bo em van êrîşan, vala derbixin, divê em berê xwe bidin yekîtiya gelê Kurd ku hevrê Salih Muslim jî ew yek heta dawiyê jî weke xaleke sereke esas digirt. Hem jî ji bo pêşîgirtina şerê li ser Rojhilata Navîn, divê Kurd bibin yek.”
FIKIR Û FELSEFEYA RÊBER APO DI XWE DE ÇAND
Rûken Ehmed keda Salih Muslim ya ji bo tevahiya neteweyan bi bîr xist û got ku Salih Mislim ji bo tevahiya neteweyan bê navber têkoşîneke bêhempa meşand û got: “Keda hevrê Salih Muslim li ser hemû neteweyan heye. Ji bo ku em jî bikaribin rêya hevrê Salih Muslim bişopînin, divê em li ser xeta hevrê Salih Muslim bin. Zarokên wî jî ji dîtina wî têr nedibûn, ew ji bo avakirina civakeke azad û wekhev bi şev û roj di nava xebatan de bû. Heta bi nêzîkatiya xwe ya bi hevrêyên jin re ku bi ruhê fikra Rêber Apo de tev digeriya, ew dibe mînak. Ji bo ku wê fikrê jî pêk bîne jî bê navber têdikoşiya.”
Rûken Ehmed di dawiya axaftina xwe de sersaxî ji gelê Kobanê yê ku niha di nava dorpêçeke gelekî giran de ye xwest û ev yek anîn ziman: “Pêwîst e gelê me û bi taybet gelê Kobanê xeta Salih Muslim heta dawiyê bişopînin û em doza hevrê Salih Muslim ji bo xwe esas bigirin. Em jî weke hevrêyên Salih Muslim em soz didin ku em ê doza wî bişopînin û ji bo jiyaneke wekhev û azad em ê xeyalên wî pêk bînin.”
