Yek ji girîngtirîn stûna Şoreşa Rojava jin in. Bi destpêkirina şoreşê jinên Rojavayê Kurdistanê xwe birêxistin kirin û li hemberî hemû hêzên qirker û siyasetên ku li ser jinan dihatin meşandin, têkoşîna xwe ya rojane bilindtir kirin. Beşeke girîng ya ku di bingeha Şoreşa Rojava de cih digire jî avakirina Yekîneyên Parastina Jin (YPJ) e. Avakirina yekemîn tabûrên jinan li herêma Efrînê dest pê kir û YPJ’ê heta roja îro li tevahiya cîhanê deng vedaye. Her wiha di Şoreşa Rojava de YPJ bû stûn û piştevaneke girîng ji bo tevahiya jinên li qadê û jinan di her beşekê de cih girt. Li ser wê esasê bi tekoşîna YPJ û jinên Rojavayê Kurdistanê, Şoreşa Rojava bi Şoreşa Jinan hate pênasekirin.
Di 12’emîn salvegera damezrandina Yekîneyên Parastina Jin de ku dikeve 4’ê Nîsanê roja rojbûna Rêber Apo, Berdevka YPJ’ê Roksan Mihemed ji ANF’ê re axivî.
Ruksen Mihemed di destpêka axaftina xwe de 4’ê Nîsanê û damezrandina YPJ’ê li Rêber Apo pîroz kir û ev yek anîn ziman: ‘’4’ê Nîsanê ji bo me mîlada hebûn, azadî û serfiraziyê ye. Bi saya fikir û ramanên Rêber Apo jinan xwebûn û hebûna xwe ferq kirin. Li ser wê esasê heta niha tekoşîna xwe bi serfirazî û serbilindî didin meşandin. Ev roj wê her bibe roja ku em soza xwe ya ji bo kûrkirina zanebûn, ruh, fikir û bîrdoziya xwe nû bikin û ji bo azadiyeke mayînde em tekoşîna xwe bilindtir bikin”
Berdevka YPJ’ê Ruksen Mihemed piştre bal kişand ser roja damezrandina YPJ’ê û got: ”Yekîneyên Parastina Jin di rojeke dîrokî de hate damezrandi. YPJ bû xilasiya jinan a ji koletiyê, bû guhertin û veguhertin ji bo hemû jinan da ku îro em bi serbilindî dibêjin em jin in, em hene û em ê hebin. YPJ’ê li hemû qadan îspat kir ku jinan şoreşek pêk anî û pêşengtiya wê dike, bi rê ve dibe û bigihîne azadiyê. Girêdayî vê yekê em 4’ê Nîsanê li tevahiya jinên têkoşer, şehîd û hemû şervan û fermandarên ku niha li eniyên rumetê ji bo avakirina civakeke demokratîk û parastina civaka xwe li ber xwe didin, pîroz dikin.”
Ruksen Mihemed di berdewamiya axaftina xwe de diyar kir ku YPJ 12 salên têr û tije li pey xwe dihêle û wiha domand: ‘’Her kêlî û rojeke ji meşa azadiya YPJ’ê dîrokek e. Ji ber ku her kêlî û nefesa ku em ji bo azadiyê di nava YPJ’ê de distînin, ji bo tekoşînekê ye ku em bibin sîber û sîwana ku mafê jinan biparêzin, azadiya wan misoger bikin û civakeke azad ava bikin. Destkeftiyên ku hatine bidestxistin û pêvajoyên ku YPJ têre derbas bûne, pêvajoyên dîrokî ne û guhertin û veguhertinên mezin bi xwe re anîn. Ji şerê Serê Kaniyê yê di 2013’yan bigire heya berxwedana Kobanê ku li vir bi pêşengtiya jinan ruhê yekîtiyê hate avakirin, heya Baxoz û Bendava Tişrînê, Dêr Hafir û Qereqozaxê bi pêşengtiya YPJ’ê azadî pêk hat û rûmet û axa Sûriyeyê hate parastin”
Ruksen Mihemed pişte şehîdên ku di vê tekoşînê de şehîd bûne bi bîr anîn û ev yek anîn ziman: ‘’Dema ku em qala van destkeftiyan dikin divê em şehîdên ku ji bo me bûne cihê îlham û moralê bi bîr bînin û têkoşîna xwe xurtir bikin. Her wiha li kêleka wan ên ku em ji wan hêz digirin, dayîkên şehîdan in. Bi saya wan em bi hêz li ser piyan in û têkoşîna xwe xurtir dikin. Wan dayîkan di van demên dawî de li Bendava Tişrînê sekna xwe ya birûmet nîşan dan. Ji bo wê jî em serbilind in ku em keçên van dayîkan in. Ji ber wê jî em dibêjin ku em ê ji bo dayîkan, jinan û zarokan jiyaneke demokrat ava bikin û her tekoşîna xwe berdewam bikin”
Ruksen Mihemed diyar kir ku YPJ’ê ji hemû jinan re îspat kir ku hêza jinan e û got: ”YPJ bi pêşengtiya jinên Kurd dest pê kir, lê kêlî bi kêlî ew hêz û fikir mezin bû û a niha jinên Ereb, Suryan, Çerkez, Asûr û jinên enternasyonal di nava refên YPJ’ê de cih digirin. Ji ber ku YPJ’Ê fikra xwe mezin kir û di pratîka xwe de îspat kir ku YPJ hêza jinan e. Em jî dixwazin li gel hemû jinên ku li Sûriyeyê jiyan dikin, divê em bi hevr e jiyana xwe ya azad biafirînin, em xwe biparêzin. Ji ber ku kesê ku nikaribe parastina xwe bike wê teslîmî mirin û koletiyê bibe.’’
Ruksen Mihemed di dawiya axaftina xwe de soza xwe ya ji bo mezinkirina têkoşîna azadiyê nû kir û got: ‘’Heta ku em nefesa azadiyê distînin, em ê her tim di warê ruh, fîzîk û mêjiyî de xwe nûjen bikin, da ku em bikaribin layîqî berxwedana gelê xwe, şehîdên xwe û tekoşîna jinan bibin. Her wiha em vê sozê didin ku em ê her bi têkoşîna xwe li gel tevahiya jinan û gelan bin û em ê wê têkoşînê bi hev re bi tevahiya jinan re bikin yek da ku em hêza xwe mezintir û bi rûmetir bikin.”
