Danişîna 16’an a doza tetîkkêşê Hîzbullahê Cîhan Aydin ku ji ber qetilkirina Sîncar tê darizandin, li 6’emîn Dadgeha Cezayên Giran a Amedê hat lidarxistin. Hevjîna Sîncar, Cîhan Sancar û parêzerên wan Mehdî Ozdemîr, Yakup Guven û Mehmet Emîn Gokdemîr tev li danişînê bûn. Tetîkkêş Yildiz û parêzerê wî jî bi rêya SEGBÎS’ê tev li danişînê bûn. Rêveberên Şaxa Komîsyona Hiqûqê ya Komeleya Mafên Mirovan (ÎHD) a Amedê û reveberên Navenda Giştî jî danişîn şopandin.
Parêzer Mehdî Ozdemîr di danişînê de got ku dozgeriyê di çarçoveya dosyayê de di 29’ê Adara 2021’ê de mutalaa nedaye û got: “Di doza qetilkirina wekîlê Mêrdînê de tenê tetîkkêşek tê darizandin. Û ew jî bi jinûvedarizandinê hate berdan. Pêvajoyeke ku hewl didin faîl biparêzin tê meşandin. Ji hêla me, malbat û gelê Kurd ve ev yek tê wateya ‘zirxê darazê.’ Divê were tespîtkirin ku jinûvedarizandin bêhiqûqî ye. Û di vê çarçoveyê de hewceye ev kes dîsa were girtin.” Parêzer Guven û Gokdemîr jî gotin tev li parastinê dibin û ji bo dosya bi demê re nehêle vehêlandin, divê ji bo amadekirina mutalaayê dem were diyarkirin.
Bersûc Yildiz jî daxwaza beraeta xwe kir.
Dadgehê careke din ji bo amadekirina mutalaayê xwest dosya ji dozgeriyê re bê şandin. Danişîn, taloqî 2’yê Hezîrana 2026’an hate kirin.
Wekîlê Partiya Demokrasiyê (DEP) ê Mêrdînê Mehmet Sîncar di 4’ê Îlona 1993’yan de ji bo lêkolînkirina qetilkirina endamên partiyê Habîp Kiliç û Hikmet Kiliç çû Êlihê. Sîncar, li gel Rêveberê Rêxistina DEP’a Êlihê Metîn Ozdemîr hate qetilkirin. Di nava salan de têkildarî cînayetê her çend navên cuda derbas bibin jî bes Cîhan Yildiz hate darizandin. Yildiz ê ku beriya niha derbarê wî de biryara muebeta girankirî hate dayîn, girêdayî biryarên DMME’yê di pêvajoya dubare darizandinê de di sala 20192an de hate tehliyekirin. Di doza ku ev şeş sal in berdewam dike de hê jî mutalaa nehatiye pêşkêşkirin.
