Endamê Desteya Rûspiyên Bakur û Rojhilatê Sûriyê û Serokê Meclîsa Qebîleya Tayî Hesen Ferhan Ebdul Rehman El Tayî ji ANF re qala nameya ku Rêber Apo ji bo eşîran şandibû kir û diyar kir ku di nameyê de hezkirin û aştî li pêş bû.
Hesen Ferhan Ebdul Rahman di destpêka axaftina xwe de got, “Nameya ku Rêber Apo ji qebîle û eşîrên Ereb re şandiye, berî ku siyasî ango ji bo danîna stratejiyekê be, nameyeke aştiyê û mirovahiyê bû. Rêber Apo di nameya xwe de têkiliya di navber Kurd û Ereban de anîbû ziman û tê de diyar kiribû ku ev têkiliya di navbera Kurd-Ereban de têkiliyeke dîrokî ye.”
Hesen Ferhan Ebdul Rahman di nav axaftina xwe de diyar kir name di demek pir hesas de hat û axaftina xwe domand, “Her kesî xwest di îstîkar û ewlehiya Bakur û Rojhilatê Sûriyeyê de bilîze û tevlîhev bike. Di encama wê de jî gelek komployên siyasî li herêmê tên meşandin. Her kesên ku dixwaze van bûyeran pêk bînin dixwaze vê yekê bi rêya eşîran bike. Ji bo wê jî nameya Rêber Apo di demeke pir hesas de hat. Her wiha name bi awayekî pir vekirî û fêmker hatiye nivîsandin. Projeya neteweya demokratîk ku ji aliyê kesayetekî weke Rêber Apo ku layîqî birêvebirinê gelan e û karîbû dengê doza Kurdî bigihîne cîhanê, her wiha karîbû lihevkirinek di navber Kurd-Ereban û pêkhateyên herêmê de ava bike.”
Serokê qebîley Tayî Hesen Ferhan Ebdul Rahman anî ziman ku eşîr û qebîleyên herêmê bi hezkirineke mezin pêşwazî li nameya Rêber Apo kirin û wiha axaftina xwe domand, “Dema ku name gihîştin pêkhateyên Ereb û bi taybetî rûspiyên eşîr û qebîleyan me dît ku çawa eşîr û qebîleyên me nameya Rêber Apo bi hezkirineke mezin pêşwazî kirin û meraqek mezin hebû ku ka Rêber Apo çi ji wan re gotiye. Name li ser rûspiyên eşîr û qebîleyên herêmê hate belavkirin. Her wiha piştî ku name gihîştin ber destê eşîr û qebîleyên herêmê wan jî nêrînên xwe li ser nameyê parve kirin û diyar kirin ku ew jî destekê didin lihevkirin û yekîrêya gelan, da ku îstîqrar û ewlehiya ku Rêber Apo di nameya xwe de diyar kiriye pêk were.”
Di dewama axaftina xwe de Hesen eşkere kir wê têkiliya di navber Kurd û Erban de dewam bike û wiha got, “Ev têkiliya di navber Kurd-Ereban de têkiliyeke dîrokî ye, li ser esasê ku li hember welatê xwe berpirsiyarî rakirin e. Ji bo wê ev têkilî di navber her du gelan de wê dewam bike. Fîtneyên ku li herêmên din di navber eşîr û gelên herêmên Sûriyeyê de derketine weke Siwêda û Dêrazor û gelek herêmên din, gelek caran hewldanên wan li ser derxistina fîtneyan bi rêya ragihandin û medya dîjîtal ji bo eşîran çêdibe. Lê em li herêmên Bakur û Rojhilatê Sûriyeyê rê li pêş fîtneyên bi vê awayî venakin û heta niha me tiştek bi vê awayî nedîtine.”
Di dawiya axaftina xwe de Endamê Desteya Rûspiyan a Bakur û Rojhilatê Sûriyeyê û Serokê Qebîleya El Tayî Hesen Ferhan Ebul Rahman tekez kir ku nameya Rêber Apo rastiya wekheviyê dide diyarkirin û got, “Dema ku nameya Rêber Apo li ser eşîr û qebîleyên herêmê dihat belavkirin, min jî cihê xwe di komîteyê de girtibû. Her ku em derbasî meclîseke eşîr û qebîleyekê dibûn, me didît ku şêx bi tevî eşîr ango qebîleya xwe hemû pêşwaziya nameya Rêber Apo dikirin û hemû eşîr û qebîleyên diyar kirin ku xalên Rêber Apo di nameyê de diyar kiribûn divê teqez pêk werin.”
