Li seranserî Kurdistan û Tirkiyeyê bi pêşengiya Partiya Wekhevî û Demokrasiyê ya Gelan (DEM Partî), Tevgera Jinên Azad (TJA) û Partiya Herêmên Demokratîk (DBP) de di çarçoveya “Civînên Aştî û Civaka Demokratîk” bêyî navber civînên gel tên lidarxistin. Di çarçoveya civînên “Civînên Aştî û Civaka Demokratîk” de li Amedê serdana 8 hezar malan hat kirin û zêdetirî 200 civînên gel hatin lidarxistin. Di civînên gel de daxwaza hevpar a gelan azadiya fîzîkî ya Rêber Apo û avêtina gavên şênber a dewletê di çareseriyê de bû.
Hevserokê Rêxistina DEM Partiyê yê Amedê Abbas Şahîn der barê civînên gel ên li Amedê de ji ANF’ê re axivî. Şahîn anî ziman ku di rewşa heyî de li Rojhilata Navîn pêvajoyekî guhertîn û veguherînê ya cidî heye û got: “Rêberê Gelê Kurd Birêz Abdullah Ocalan yek ji kesên ku Rojhilata Navîn herî baş dixwîne ye. Têkildarî vê guherîn û veguherînê pêvajoyek da destpêkirin. Gelê Kurd û Rêberê Gelê Kurd timî jidil nêz bûn. Xwest siyaseta demokratîk bike jiyanî. Ev daxwaz bi awayekî pir cidî bersivên xwe dît.
Wekî hûn dizanin, li vê derê sedemek têkoşîna 52 salî, têkoşîna çekdarî ku zêdeyî 40 sal in dewam dike heye. Ev sedem hebûna gelê Kurd eşkere dikir. Di rewşa heyî de hebûna gelê Kurd hat îspatkirin. Hate diyarkirin ku piştî vê saetê ji çekê zêdetir, divê biaxivin, siyaseta demokratîk jiyanî bikin û birêxistin bikin. Xebatên ku niha tên kirin jî bi vî awayî dewam dikin.”
JI BO PÊVAJOYÊ PIŞTGIRÎ JÎ HEYE, FIKAR JÎ
Şahîn ragihand ku di fêmkirin û nirxandina pêvajoyê de gel xwedîderketineke xurt nîşan dide û wiha pê de çû: “Dema ku Rêberê Gelê Kurd Abdullah Ocalan di 27’ê Sibatê de bang kir, ev bang ji aliyê her kesî ve bi bendewariyeke hem bitevdîr hem jî bi hêvî hate pêşwazîkirin. Me jî bi destpêkirina pêvajoyê re dest bi serdanên malbatan kir. Di wê demê de serdana zêdeyî 8 hezar malan hatin kirin. Piştî ku bi deh hezaran kesan re hevdîtinên rû bi rû hatin kirin, divîyabû pêvajoyeke ji bo avakirina civaka demokratîk dest pê bike.
Di 9’ê Tîrmehê de ji aliyê Birêz Ocalan ve bangekî din jî hat kirin. Piştî 26 salan cara ewil bangekî bi dîmen hate kirin. Piştre di 11’ê Tîrmehê de merasîma şewitandina çekan hate lidarxistin. Ev jî nîşaneya jidilbûnê bû. Ev nîşaneya jidilbûnê ne tenê li ser Kurdan bandorek mezin li ser gelên Tirkiye û cîhanê jî kir.
Me jî bi vê pêvajoyê re ji bo avakirina civaka demokratîk xebatekî da destpêkirin. Dema ku me vê xebatê kir, me bi gelê xwe re tevger kir. Li seranserê Tirkiyeyê planlamaya 2 hezar civînan hate kirin û me zêdeyî 2 hezar civîn pêk anî. Me li Amedê jî zêdeyî 200 civînan pêk anî.
Tişta ku di van civînan de derket pêşiya me ew bû ku polîtîkayên netew-dewlet ya sed salî bi yekbûna asîmîlasyonê re li ser civakê xerakirinên pir cidî afirandiye. Hate dîtin ku ev xerakirin çûye astekî bêveger. Lê Rêberê Gelê Kurd Abdullah Ocalan bi gava xwe re avakirina xwişk-biratiya hezar salî ji nû ve û bê ka jiyana hevpar çawa bibe eşkere kir.”
‘HESRETEKÎ CIDÎ JI BO AŞTIYÊ HEYE’
Abbas daxwazên sereke yên gel ku di civînan de derketin pêş wiha vegot, “Yek ji daxwazên herî mezin ên ku di civînan de derketin ew bû ku divê gavên hevbeş bêne avêtin. Hate gotin ku li welatekî wekî li Tirkiyeyê ku dibe ku pêvajo bi awayekî cidî werin sabotekirin, divê li hemberî vê yekê baldarî hebe. Qala bêbaweriyekî dihate kirin.
Di bingeha vê bêbaweriyê de me dît ku em di nava pêvajoyeke de ne ku avaniya dewletê ku naxwaze dev ji fêrbûnên xwe yên sed salî berde, dibe di pêşwazîkirina daxwazên gel de kêm bimîne, heta daxwazên gel ji nedîtî ve were heye.
Lê gavên ku hêdî hêdî hatin avêtin û pêvajoya ku pê re derket nîşanî me da ku êdî pevçûn çênabin, xwîn nayên rijandin û çavkaniyên welat ji bo şer naçe. Ev xak ji xwîn û rondikan têr bû. Gel dixwaze pêvajoyê bi aştiyê re bi encam bibe.”
‘DIVÊ ASTENGIYÊN LI PÊŞIYA SIYASETA DEMOKRATÎK WERIN RAKIRIN’
Abbas Şahîn bal kişand ser komîsyona ku wê têkildarî pêvajoya “Aştî û Civaka Demokratîk” li Meclîsê were avakirin û wiha got: “Xebatên komîsyonê me kelecan dike. Pêwîstbû guherîn û veguherînên qanûnî hebûn.
Ji bo guherînên qanûnî pêvajoya komîsyonê hate destpêkirin. Bi îhtîmaleke mezin komîsyon wê bi meha Tebaxê re dest bi xebatên xwe bike. Divê astengiyên li pêşiya siyaseta demokratîk werin rakirin. Bendewariyên cidî yên civakê hene. Ji beriya her tiştê divê ev xerabûna ku civak dijî, ji holê were rakirin. Ji bo pêkanîna aştiyekî bi rûmet divê gavên pêwîst demildest bêne avêtin.”
