Endamên Şandeya Îmraliyê ya DEM Partiyê Pervîn Buldan, Mîthat Sancar û Faîk Ozgur Erol, piştî civîna Koma AKP’ê serdana Partiya Karkerên Tirkiyeyê (TÎP) kirin. Endamên şandeyê li meclisê bi Serokê Giştî yê TÎP’ê Erkan Baş û parlamenter Ahmet Şik û Sera Kadigîl re civiyan. Her du şande piştî civînê daxuyanî dan.
ERKAN BAŞ: EM DI XALEKE HÊVIYÊ DE NE
Serokê Giştî yê TÎP’ê Erkan Baş ji ber serdanê spasiya Şandeya Îmraliyê ya DEM Partiyê kir û têkildarî naveroka civînê nirxandin kir. Baş diyar kir ku xebatên komîsyona meclisê yên derbarê pêvajoyê de hatine nîqaşkirin û destnîşan kir ku avakirina aştiyeke mayînde, azadiya rastîn û Tirkiyeyeke demokratîk pêwîstiyeke dîrokî ye.
Baş ev tişt anî ziman: “Em ji destpêkê ve hewl didin ku ji bo li ser vê axê xwîn nerije û hêsir neyên barandin berpirsyariyê bigirin ser xwe. Me nirxand ka çawa dikare atmosferek siyasî were avakirin ku xwişk-biratiya karkerên Tirk û Kurd ji mijara nîqaşê were derxistin. Di dawiya civînê de, em di noqteyeke bi hêvîtir de ne.”
PERVÎN BULDAN: JI BO AŞTIYÊ PÊDIVÎ BI HIQÛQÊ HEYE
Li ser navê şandeya Îmraliyê ya DEM Partiyê Pervîn Buldan axivî. Pervîn Buldan diyar kir ku civîn pir berhemdar bû. Buldan anî ziman ku qonaxa niha ya pêvajoyê bi berfirehî nîqaş kirin û bi bîr xist ku TÎP bi xebatên komîsyona meclisê û raya giştî tevkariyeke pir girînd daye pêvajoyê.
Pervîn Buldan derbarê qonaxa dawî de ev tişt anî ziman: “Em niha gihîştine noqteyeke diyarkirî. Em di pêvajoya derbasbûna zemîna qanûnî de ne. Em her tim dibêjin pêwîstî bi hiqûqa aştiyê heye. Em dibêjin ku aştî bêyî hiqûqê pêk nayê. Di pêvajoya pêşerojê de hewcedariya me bi tevkariya Partiya Karkerên Tirkiyeyê heye. Em di wê baweriyê de ne ku xebatên bi taybetî jî li rojavayê Tirkiyeyê bên meşandin wê tevkariyeke girîng bide pêvajoyê.”
Civîn bi nîşandan îradeya hevpar a ji bo pêşvebirina pêvajoyê bi dawî bû.
