Wênevan Sarya Melek Demîr di pêşangeha xwe de ya bi navê “Fîncanek Axê” ku bi teknîka boyaxkirina qehweyê ya li ser kaxizê amade kir, nexşên jinê, çanda Kurd û wêneyên ji jiyanê pêşkêş dike. Di pêşangehê de yekbûna jinê bi xwezaya axê re bi rêya hunerê tê vegotin.
Wênevan Sarya Melek Demîr ku sala 2016’an bi Biryarnameya di Hukmê Qanûnê (KHK) de ji pîşeyê xwe hate dûrxistin, berê xwe da karên hunerê. Sarya Melek Demîr pêvajoya hilberînê û çîroka li pêşangeha ‘Fîncanek Axê’ ji ANF’ê re vegot.
Sarya Melek Demîr anî ziman ku pêvajoya bi serê wê de hat ew hîn bêhtir nêzî hunerê kir, hilberîn di heman demê de encamek ji lêgerînê ye û got, “Ez ji Kirşehîrê me. Malbata me ji Kurdên sirgûnkirî ye. Min mamostetî dikir, lê belê bi KHK ji pîşeyê xwe hatim dûrxistin. Ew pêvajo ji bo me hemûyan giran derbas bû. Ji bo debara xwe em neçar man ku li qadên cuda bixebitin. Lê belê di nava vê pêvajoyê de têkiliya min a bi wêne re bêhtir xurt bû. Ji xwe ji zarokatiyê ve bala min li ser wêne bû, lê lêgerînên min, hestên min û bûyerên hatin serê min kir ku hilberînim. Bi bicihbûna li Amedê min xwest nasname û çanda xwe hîn bibim. Piştî ku li Amedê bi cih bûm ketim nava lêgerîna jinûve peydakirina çand û nasnameya xwe. Ji xwe ew cih bû ku diçim û dihatim, lê belê piştî ku lê bi cih bûm ev lêpirsîn hîn kûrtir bû. Pêşangehê jî bi vî rengî destpê kir. Destpêkê bi bandora ji kincên herêmî yên jinên Kurd û wêneyên kevn min hin kar kir. Piştre jî pê hesiyam ku ev yek veguheriye pêşangehekê.”
KELECANA PÊŞANGEHA DESTPÊKÊ YA ŞEXSÎ
Sarya Melek Demîr diyar kir ku kelecana vekirina pêşangeha destpêkê ya şexsî ji bo wê xwedî wateyeke cuda bû û axaftina xwe bi vî rengî dewam kir, “Min nomrla pêşkêşî dikir û ne miroveke welê bûm ku gelekî kelecanî dibûm. Lê belê hesta min ku di vê pêşangehê de hîs kir cuda bû. Ji ber ku li vê derê ne tenê tablo hene; jiyana me, êşên me, lêgerîn û hêviyên me jî hene. Ez sekna mirovan a li pêşberî berheman dişopînim. Ji ber ku carna tenê bi nêrînekê jî ji we re qala gelek tiştan dike. Pêvajoya amadekariyê du salan dewam kir. Gelek astengî derkretin pêşiya min. Meha Gulanê neçar mam ku pêşangehê çar caran taloq bikim. Roja vekirinê zîpikê lê kir, bahoz rabû. Li gel vê jî serdana mirovan a li pêşangehê westandina mirovan dide jibîrkirin. Ji ber ku tişta we çêkir dema gihîşt civakê hingî bi wate dibe.”
‘MIN JIN Û AX JI HEV CUDA NEDÎT’
Sarya Melek Demîr bal kişand ser wateya navê ‘Fîncanek Axê’ û ragihand ku di pêşangehê de wê hewl da qala têkiliya navbera jinê û axê bike. Sarya Melek Demîr got, “Di karên min de fîgura jinê gelekî serwer e, ji ber ku jiyanê bi rêya jinê dinirxînim. Çawa ku jiyan li xakê şîn dibe, jin jî jiyanê mezin dike, ava dike. Ji mîteolojiyê heta bi roja Îro jin û ax her tim bi hev re hatine bîranîn. ji Gaia heta bi Îştarê, ji Demeterê heta bi Kîbeleyê hemû vegotin li ser vê yekê hatine avakirin. Reng û bêhan qehweyê axê tîne bîra min. Ji ber vê min giranî da ser karê monokroma bi qehweyê. Min xwest reng, bêhna axê û têkiliya jinê ya bi jiyanê re li heman cihî bigihîne hev. Ya rast min hewl da fîncanek qehweyê û fîncanek axê di heman hişî de bigihînim hev.”
‘POTANSIYELA HUNERÎ YA AMEDÊ GELEKÎ MEZIN E’
Sarya Melek Demîr destnîşan kir ku ji ber wateyeke taybet wê pêşangeya xwe li hewşa Dêra Keldanî vekir û diyar kir ku dewlemendiya çandî ya Amedê qadeke xurt pêşkêşî hunerê dike.
