Nurhak Çiya (Halit Dag) ê ku di 14’ê Adara 2011’an de di encama êrîşa artêşa Tirk de li navçeya Basan a Şirnexê şehîd bûbû, di 15’emîn salvegera şehadeta xwe de li ser gora xwe ya li gundê Şêx Mahmud ê navçeya Omeryan a Mêrdînê hat bi bîr anîn.
Malbata wî, nûnerên MEYA-DER’ê û gelek kes beşdarî bîranînê bûn. Bername bi deqeyek rêzgirtinê ji bo şehîdên Kurdistanê dest pê kir.
Piştre nûnerê MEYA-DER’ê yê Mêrdînê Salih Kurtay axivî û bal kişand ser ku meha Adarê meha berxwedan û lehengiyê ye û girîngiya berxwedana li dijî zilmê destnîşan kir. Kurtay got: “Heke gelek di bin zilmê de be, zimanê wî hatibe qedexekirin û were înkarkirin, heke lehengên wekî heval Nurhak neban, wî gelî nedikarî hebûna xwe bidomîne. Di dîroka cîhanê de gelek leheng hene ku ji bo azadiyê li ber xwe dane û jiyana xwe ji dest dane. Navên wekî Şehîd Nurhak Çiya û Bêrîtan jî ji bo azadiya gelê xwe têkoşiyan. Gelê Kurd bi salan e têkoşîneke bê navber dimeşîne. Bi xêra şehîdan îro gelê Kurd gav bi gav ber bi azadiyê ve dimeşe.”
Birayê Nurhak Çiya, Mehmet Ali Dag jî spasiya her kesê ku beşdarî bîranînê bûne kir û anî ziman ku şehîd ne tenê yê malbata xwe ne, nirxên hevpar ên tevahiya Kurdistanê ne û ew ê xwedî li mîrasa têkoşînê derkevin.
Bîranîn piştî xwendina duayan bi dawî bû.
