Çavdêrê siyasî Selahedîn Saleyî, têkildarê pêvajoya çareseriyê ya ku li Tirkiye û Bakurê Kurdistanê tê meşandin ji ANF’ê re axivî.
Selahedîn Saleyî, li ser mijara diyarkirina statuya Rêber Apo axivî û diyar kir ku ev daxwaz rewa ye û got, “Rêberekî ku pêvajoya aştiyê li herêmê rêve dibe, divê di girtîgehê de neyê ragirtin.” Saleyî, got ku azadiya fîzîkî ya Rêber Apo nayê paşguhkirin û divê Tirkiye gavên berbiçav bavêje da ku pêvajo pêş bikeve.
‘DIVÊ TIRKIYE SAMÎMIYETA XWE NÎŞAN BIDE’
Selahedîn Saleyî anî ziman ku di navbera gotinên dewleta Tirkiyeyê û rastiya li ser erdê de cudahiyek heye û got, “Ew behsa xwişk-biratiya Kurd-Tirk dikin, lê ev gotin nayên pratîkkirin.” Saleyî, got ku aliyê Kurd bi dilsozî nêzî pêvajoyê dibe û diyar kir ku Tirkiyeyê hîn gavên qanûnî neavêtine û hewl dide ku dem bidest bixe. Saleyî, got ku divê komîsyona ku li meclîsê hatiye avakirin tavilê gavên berbiçav bavêje.
‘EZMÛNA DÎROKÎ Û TIRSA DEWLETA TIRK JI ÎRADEYA GEL’
Saleyî pêvajoyên aştiyê yên berê bi bîr xist û bal kişand ser Turgut Özal, Necmettin Erbakan û pêvajoya aştiyê ya sala 2013’yan. Selahedîn Saleyî, destnîşan kir ku nebûna gavên berbiçav ji hêla dewletê ve dibe sedem ku di nava gel de fikar çêbibe. Saleyî got, “Guman ne li ser gelê Kurd, lê li ser Tirkiyeyê ne.”
‘ÇARESERÎ ABDULLAH OCALAN E’
Saleyî diyar kir ku bandora Rêber Apo li ser gelê Kurd mezin e û got, “Çareserî Abdullah Ocalan e.” Saleyî, destnîşan kir ku Rêber Apo di pêkanîna aştiyê li herêmê de roleke girîng dilîze û hişyarî da ku ger Tirkiye gavên qanûnî neavêje, pêvajo dikare bigihêje qonaxeke xeternak.
‘AŞTÎ HER DEM JI ŞER ÇÊTIR E’
Saleyî got ku Kurd bi salan e ji bo aştiyê gavan diavêjin û got, “Aştî her dem ji şer çêtir e.” Saleyî anî ziman ku ger hewl bê dayîn ku îradeya gelê Kurd were şikandin, ev dikare bibe sedema bersivên cuda. Saleyî, behsa pêşketinên li herêmê kir û got ku Tirkiye rageşiya Îran-Îsraîl/DYE dişopîne. Saleyî, diyar kir ku êdî mafên gelê Kurd nayên înkarkirin û hişmendiya neteweyî di nav Kurdan de xurt dibe.
‘YEKÎTIYA NETEWEYÎ MISOGERIYA SERKETINÊ YE’
Selahedîn Saleyî banga yekîtiya neteweyî li hemû partî û komên Kurd kir û got ku “Yekîtiya neteweyî misogeriya serketinê li her çar perçeyên Kurdistanê ye.” Saleyî, diyar kir ku divê li şûna berjewendiyên partiyan, siberoja gel were berçavgirtin.
