Li bajarê Kobanê ya Kantona Firatê, merasîma sersaxiyê ji bo şehîd Nûreddîn Sofî, Koçero Urfa û Doxan Amed hate lidar xistin.
HPG’ê, îro ragihand ku pêşengên Tevgera Azadiya Kurdistanê Nûredîn Sofî di 6’ê Nîsana 2021’an de li Garê û Koçero Urfa jî di 4’ê Mijdara 2019’an de li Herêmên Parastinê yên Medyayê şehîd bûne.
Piştî daxuyaniya HPG’ê, konê sersaxiyê li Qada Şehîd Egîd a bajarê Kobanê hate danîn û bi sedan şêniyên Kantona Firatê berê xwe dan merasîma sersaxiyê.
BI SAYA PÊŞENGÊN XWE EM LI VIRIN
Ji Meclîsa Malbatên Şehîdan a Kantona Firatê Necmê Kinco, diyar kir ku wan sond xwariye heta dawiyê pêşengên xwe bişopînin û sersaxî ji malbata şehîdan re xwest. Necmê Kinco, anî ziman ku ew îro bi saya fedakariyên şehîdan hene û destnîşan kir ku têkoşîn bi Mazlûm, Egîd, Kemal, Arîn û Rêvanan re dest pê kir, îro bi Nûredîn û Koçeran berdewam dike û got ku bi mîlyonan kes dê vê rêyê bişopînin.
Ji Meclîsa Leşkerî ya Kantona Firatê Îsmaîl Elî, jî diyar kir ku şehîdan ji bo azadkirina gel fedakariyên mezin kirine û got ku dê şopa Elî Heyder Qaytan, Riza Altûn, Nûreddîn Sofî û Koçero Urfa were şopandin û armanca wan bi serketinê bê tacîdarkirin.
