Nanaxanim Babzade ku ji bo perwerdeyê hat Tirkiyeyê û wek çalakvan têdikoşe, ji ber xebata xwe ya li Meclîsa Ciwanan a HDK’ê ji aliyê Navenda Vegerandinê ve hat gazîkirin. Li wê derê sixûrî lê hat ferzkirin, lê ji ber ku sixûriyê qebûl nekir, du meh in bi sûcdariya “kesê ku gef li ewlehiiya giştî dixwe” tehdeyiyê dibîne. Parêzerê wê diyar kir ku sûcên li ser wê bêbingeh in û got ku hemû mafên wê tên desteserkirin û ji bo rewşa wê serî li Dadgeha Destûra Bingehîn dane.
Parêzvana mafên jinan a Azerbeycanî Nanaxanim Babzade bi navê xwe ya tê zanîn Nana, ji roja ku ji bo perwerdeya lîsansê hat Tirkiyeyê ve, hem di qada akademîk hem jî polîtîk de têkoşînê dimeşîne. Nana ku cihê xwe di tevgera femînîst û parêzvaniya mafên sewalan de digre, tevî avaniyên wekî Meclîsa Ciwanan a HDK’ê re tevlî çalakiyên demokratîk ên cuda bû. Ev xebatên wê wekî li dijî polîtîkayên koçberiyê yên li Tirkiyeyê hat dîtin û rûbirûyê cezayên hiqûqî û îdarê ma.
Parêzerê wê Ahmet Baran têkildarî bûyerên li ser muwekîla xwe wiha got: “Ji bi perwerdeyê tê Tirkiyeyê, têkiliya wê bi malbata wê re nîne. Keseke ku di têkoşîna vegan, femînîst û polîtîk de çalak e. Piştî ku tevlî protestoyeke li dijî zamên xwarinê ya Zanîngeha Stenbolê dibe, ji aliyê Îdareya Koçberiyê ve bi hinceta kêmbûna ewraqan hat gazîkirin. Li wê derê sixûrî lê hat ferzkirin; jê xwestin ku derbarê Meclîsa Ciwanan a HDK’ê û Tevgera Kurd de agahî bide. Dema ku qebûl nekir, di meha Tebaxê de ‘qoda sînorkirinê’ dan, destûra wê ya rûniştinê hat betalkirin û hat binçavkirin.
LI NAVENDA VEGERANDINÊ TUNDÎ HAT KIRIN
Nana sewqî Navenda Vegerandinê ya Çatalça (GGM) hat kirin. Li ser wê hem biryara dersînorkirinê hem jî biryara çavderiya îdarê heye. Parêzer Çelîk diyar kir ku Nana di pêvajoya binçavkirinê de tundiya fîzîkî dîtiye û di raporên wê yên nexweşxaneyê de peydên derbê hene û wiha got: “Dema ku ewil hat girtin, li wesayîtê tevî koçberên jin ên cuda re bû. Tundiyê dît, sê rojan di odeyekê de hat girtin, xwarin nehat dayîn. Ji ber ku sîxûrtiyê red kir, zextê lê kirin.”
MAFÊ WÊ YÊ PERWERDEYÊ HAT DESTESERKIRIN
Perwerdeya lîsansê ya Nanayê di serdema dawî de ye, lê ji ber ku di çavdêriya îdariyê de ye mezûnbûna wê pêkan xuya nake. Parêzerê wê Çelîk li ser mijarê wiha got, “Encama dozê wê ji beriya Nîsan-Gulanê dernekeve. Ev jî tê wateya ku herî kêm wê salek din jî li vir bê girtin. Mafê wê yê perwerdeyê hatiye desteserkirin.”
Şert û mercên Çatalcayê jî giran in. Nana vegan e, lê li navendê xwarinên li gor wê nînin. Parêzer Çelek wiha got: “Nikare xwarin bixwe, zeîf bû û nexweş ket. Di hevdîtina dawî de ji ber nexweşiya xwe bi maskeyê hat. Ji ber ku nikare xwe xwedî bike, ji hal dikeve. Her wiha şert û mercên li Çatalcayê pir xirab in. Ji çûyîna Nana ve herî kêm 2 kes li wê derê xwekuştine. Heta qala çar dozên xwekuştinê hat kirin, tenê navên du kesan zelal bûye.”
SÛCARKIRIN BÊBINGEH IN
Li ser Nana, ‘qoda sînorkirinê’ heye ku wateya wê “kesê ku gef li ewlehiya giştî dixwe”. Li gorî parêzerê wê tu bingehên wê sûcdarkirinê tune ne. Parêzer Çelîk destnîşan kir ku berdana wê ya bi kelepçeyê elektronîk re jî nehatiye qebûlkirin û wiha got: “Me têkildarî girtina wê ya li Navenda Vegerandinê (GGM) serî li Dadgeriya Cezayê ya Sulhê da, îtîrazê kir, lê ev îtîraz nehat qebûlkirin. Niha li GGM’ê berdana bi kepelçeya elektronîk re heye. Pêkanînekî nû ye. Me ji bo vê serlêdan kiribû, lê ev jî nehat qebûlkirin. Her wiha me bi awayekî fermî serî li Dadgeha Destûra Bingehîn jî da.”
