Şervanê QSD’ê Lawend Girkê Legê (Rêwan Merîka) yê ku 9’ê Sibatê dema erka xwe bi cih dianî li bajarê Çilaxa şehîd bûbû, îro bi merasîmekê li Pakrewangeha Şehîd Xebat hat oxirkirin. Bi sedan şêniyên Çilaxa, Dêrik û Girkê Legê beşdarî merasîmê bûn.
Merasîm bi deqeyeke rêzgirtin dest pê kir. Piştre ji rêveberên Meclisa Malbatên Şehîdan a Kantona Cizîrê Zîwer Elî sersaxî ji malbata şehîd re xwest û got, xwîna şehîdên Bakur û Rojhilatê Sûriyeyê bûye sembola azadiyê.
Zîwer Elî di dewama axaftina xwe de diyar kir ku şehîd temsîla dîrokeke zindî ya gelên azadxwaz dike û ev li gotinên xwe zêde kir “Berxwedana şervanên QSD’ê ya li Bendava Tişrînê û Pira Qereqozaqê berxwedanek dîrokî ye. Şervanên me di vê qonaxa çarenûsê de efsanên lehengane raber dikin û berxwedana wan dê qedera me diyar bike.”
Ji şervanên QSD’ê yên li Dêrikê Hemîd Cûdî îşaret bi vê yekê kir ku QSD’ê mertala parastina gel e, her wiha berxwedana gel û piştevaniya wan a bi şervanan re silav kir.
Piştî axaftinan wesîqeya şehîd Lawend hat xwendin û radestî malbata wî hat kirin. Girse bi dirûşman şehîdê xwe spart axê.
