Dozgerên Fransayê guman dikin ku Lafarge di navbera salên 2013-2014’an de bi rêya şîrketa xwe ya bi navê Lafarge Cement Syria ji bo rêxistinên terorê ku DAÎŞ û El Nûsra jî di nav de ne 5 milyon euro dabîn kiriye. Rûniştina dozê dê roja Sêşemê dest pê bike û heta 16’ê Kanînê bidome.
Şîrket û rêveberên Lafarge bi tewana ku ji bo kargeha çîmento ya li Çelebiye ya Sûriyeyê xebatên xwe bidomîne alîkariya derayî daye komên cîhadîst, tên darizandin.
Li gorî nûçeya AFP’ê ji bilî Lafarge ku di sala 2015’an de ji aliyê koma Holcim a Swîsreyê ve hatibû kirîn, midûrê Lagarge yê berê Bruno Lafont, 5 berpirsyarên ewlekarî û operasyonelî ya şîrketê û du welatiyên Sûriyeyî ku navbeynkariyê kirine wê bên darizandin.
Bersûc bi “fînansekirina rêxistineke terorê” û binpêkirina cezayên darayî yên li ser Sûriyeyê hatine sepandin, têne tawanbarkirin.
Di îdîanameyê de tê diyar kirin ku bersûcan ji bo qezenc an jî berjewendiyên xwe yên şexsî li dora kargeha Çelebiyeyê polîtîkayeke fînansekirina rêxistinên terorîst pêk anîne.
Di pêvajoyek ku şîrketên din ên neteweyî ji Sûriyeyê derketin de, Lafarge karmendên xwe yên biyanî ji herêmê derxistibû û heta ku DAÎŞ’ê di Îlona 2014’an de tesîs dagir kir jî, karmendên Sûriyeyî da xebitandin.
Doz, di sala 2017’an de piştî hin nûçeyan û du giliyên cuda hate vekirin. Ev pêvajo wekî derfetek girîng ji bo edaleta Fransayê, tê dîtin.
