Konseya Federal dîroka sepandina yasaya ku di Kanûna 2023’yan de ya ji aliyê Parlamentê ve hatibû erêkirin, roja Çarşemê ragihand.
Qedexeya navborî bes ne ji bo Hamasê di heman demê de ji bo hemû avanî û komên girêdayî wê û li ser navê wê çalakî li dar xistine, derbasdar e. Armanca vê yasayê weke dabînkirina ewlehiya Swîsreyê ya derve û hundirîn, têkoşîna li dijî fînansmanên terorê û hêsankirina birêvebirina dozên cezayî hate eşkerekirin.
WÊ 5 SALAN DERBASDAR BE Û WERE NÛKIRIN
Biryar di destpêkê de wê 5 salan derbasdar be lê belê wê rê hebe ku ji aliyê Parlamentê ve dema wê were dirêjkirin. Wê ji bo avaniyên ku eleqeya wan a bi Hamasê re werin tespîtkirin jî derbasdar be û ew jî wê lê werin zêdekirin. Her wiha qedexekirinên bi vî rengî wê ji aliyê Dadgeha Îdarî ya Federal ve jî werin dîtin.
Yasa armanc dike ku rê li ber paşvekişandina Hamasê ya li Swîsreyê yan jî weke bikaranîna wê ya weke baregeheke lojîstîkî bigire. Her wiha hate diyarkirin ku wê venêrînên darayî werin hêsankirin û hevkariya navneteweyî ya ji bo şandina pereyên biguman jî bileztir bibin.
JI BO ALÎKARIYÊN MIROVÎ DERBASDAR NÎNE
Dema ku pêşnûme dihat nîqaşkirin ji bo ku înîsiyatîfên aştiyê yan jî rêxistinên civakî yên alikariya mirovî ji vê yasayê bandor nebin hin rewşên îstîsnaî jî lê hate zêdekirin. Ji aliyê rayedarên federal ve hate misogerkirin ku ceza li kiryarên bi vî rengî neyên birîn.
PÊKANÎNÊN CEZAYÎ
Madeyeke cezayî ya nû li yasayê nehate zêdekirin lê belê li gorî Kanûna Bingehîn a Swîsreyê ya heyî dikare li sûcên piştgirîdayîn û tevlîbûna rêxistinên terorê heya 20 salên hepsê yan jî cezayên pereyan werin cezakirin.
Hêjayî bibîrxistinê ye ku Swîsreyê di 11’ê Cotmeha 2023’yan de Hamas bi awayekî fermî weke rêxistineke terorê nas kiribû û girêdayî vê yekê dest bi amadekariyên yasayî kiribû. Li gel vê biryara dawîn Hamas wê bi tevahî li Swîsreyê were qedexekirin.
