Rêxistinên maf û hiqûqê Komeleya Mafên Mirovan (ÎHD), Komeleya Hiqûqnasan a Azad (OHD) û Komeleya Hiqûqnasan a Hemdem (ÇHD) li Riha, Edene, Hatay û Mersînê bi çalakiyan banga cezakirina kujeran kirin.
RIHA
Şaxên ÎHD û OHD’ê bal kişandin ser rola Elçî ya li nava têkoşîna mafên mirovan û ragihandin ku polîsên di dosyayê de dihatin darizandin hatin berdan, bi vî rengî bûyera kuştinê bêceza hate hiştin. Di daxuyaniyê de hate bibîrxistin ku dosya li ber destê Dadgeha Destûra Bingehîn e û bang li dadgehê kir ku nebe parçeyek ji mekanîzmaya bêcezahiştinê.
EDENE
OHD, ÎHD û ÇHD’ê jî bang li Dadgeha Destûra Bingehîn kirin ku biryareke eşkerekirina heqîqetê li ser dosyayê bide û rûbirûbûna bi bêcezahiştinê şertê destpêkê yê aştiya civakî ye.
HATAY
Şaxê Skenderûnê yê ÎHD’ê diyar kir ku di dosyayê de 10 sal in lêpirsîneke bi bandor nayê meşandin, delîl nehatin komkirin û doz hate bêbandorkirin. Lewma jî diyar kir ku ji bo ronîkirina kujerên rasteqîn wê têkoşîna xwe dewam bikin.
MERSÎN
ÎHD, OHD, ÇHD û Hiqûqnasên ji bo Edaletê li ber Edliyeya Mersînê daxuyaniyek dan û biryardariya xwe ya ji bo ronîkirina dozê destnîşan kirin.
