Tevgera Azadiya Jinên Êzidî (TAJÊ), ji bo balê bikişîne ser zêdebûna tundî, zextên civakî û bûyerên xwekuştinê yên jinan li Şengalê, bi tevlîbûna Yekîtiya Jinên Ciwan ên Şengalê, endam û rêveberên saziyên Rêveberiya Xweser a Şengalê bi wesîleya 25’ê Mijdarê pêngavek berfireh da destpêkirin. Pêngava ku bi dirûşmeya “Xwe nekuje, her xwekuştinek fermanek e” li Parka Şehîd Dijwar a Xanesorê bi daxuyaniyeke çapemeniyê hat ragihandin.
Berdevka Koordînasyona TAJÊ Riham Hico, di civîna çapemeniyê de diyar kir ku civaka Êzidî bi êrîşên piralî re rû bi rû ne û got ku bi taybetî jin û ciwan hedef tên girtin. Riham Hico got, “Bi taybetî di van salên dawî de xwekuştin di nav civaka me de pir zêde bûye. Em vê rewşê ji bo civaka xwe pir xeter û metirsîdar dibînin. Ev rewş di şexsê jin û ciwanan de zêdetir tê jiyîn.”
Di daxuyaniyê de hat destnîşankirin ku zextên navmalê, zehmetiyên aborî, newekheviya zayendî û dûrketina çandî di nav sedemên sereke yên xwekuştinê de ne.
Riham Hico, destnîşan kir ku ciwan bi rêya medyaya dîjîtal û polîtîkayên koçberiyê ji çand û baweriyên xwe dûr dikevin û got, “Weke civak divê bi ruhê seferbereyê em demildest li ser vê rewşa ku tê jiyîn rawestin. Divê ev rewş asayî û wekî qederê neyê dîtin û pêwîst e her yek ji me bi erk û berpirsyariyên xwe rabin. Di serî de divê her malbateke me xwe di ber perwerdekirina zarok û ciwanan de berpirsyar bibîne. Ji ber ku ciwan siberoja civaka me ne û parêzvanên çand, nasname û baweriya me ne.”
Riham Hico di dawiyê de ev tişt gotin, “Hêz û çavkaniya têkoşîna me fikir û felsefeya Rêber Apo ye. Ji ber ku yê herî zêde pirsgirêkên civakî tehlîl dike û çareseriya wê pêş dixe Rêber Apo ye. Bi taybetî li ser kuştina jinê wiha dibêje; ‘Kuştina her jinekê sedema şoreşê ye.’”
TAJÊ, banga tevlîbûna pêngavê li jin û ciwanan kir û daxuyaniya xwe bi dirûşmeya ‘Jin, Jiyan, Azadî’ bi dawî kir.
