Temellî di civîna çapemeniyê ya li Meclîsê de destnîşan kir ku di pêvajoya ku 27’ê Sibatê destpê kir û heya 26’ê Cotmehê dom kir de, gavên girîng hatin avêtin lê belê evane yekalî man.
Temellî bal kişand ser meseleya qanûna taybet û got, “Piştî ku komîsyona Meclîsê hevdîtinên têkildarî qanûna taybet temam kir, wê rapora xwe binivîse. Di çarçoveya vê raporê de jî wê nêrînên cur be cur bên girtin. Helbet ev jî nêrînek e. Ev jê dê were girtin. Bi nêrînên mîna vê re, em ê ber bi pêşniyareke qanûnê ve biçin. Hêvî dikim em ê zêde dereng nemînin. Berê 31’ê Kanûnê weke hedefek dihat nîşandan. Hêvî dikim bêyî ku dereng bikeve ev pêşniyara qanûnê were civata giştî û bibe qanûnî.”
KOMÎSYON DIVÊ ÇÛYÎNA ÎMRALIYÊ BIGIRE ROJEVA XWE
Temellî diyar kir ku Komîsyona Piştevanî, Xwişk-Biratî û Demokrasiyê ya Millî dê sibe bicive û anî ziman ku komîsyon divê mijara serdana Rêber Apo bigire rojeva xwe.
Temellî bersiva pirsên rojnamevanan da û got, divê komîsyon biryar bide û bêyî ku dereng bikeve biçe giravê.
Temellî di komcivînê de îşaret bi gelek mijaran kir.
BIRYARA DMME’YÊ ZELAL E, DADGEH SÛC DIKE
Temellî diyar kir ku hemû pêşniyarnameyên civakî yên DEM Partiyê hatine redkirin û destnîşan kir ku tevî biryarên DMME’yê jî hîna Selahattîn Demîrtaş û girtiyên din ên siyasî nehatine berdan.
Temellî got, “Biryara Dadgeha Mafên Mirovan a Ewropayê zelal û teqez e. Dadgeha Îstinaf bi pêkneanîna biryara DMME’yê, sûc dike.”
