Di daxuyaniya Koordînasyona Komalên Ciwan a 2’yê Îlonê roja Sêşemê de, hate ragihandin ku endamê wan Çiya Rizgar 25’ê Tebaxê 2025’an li qada ku tedawî lê didît şehîd bû.
Tevgera Ciwanên Şoreşger a Bakur û Rojhilatê Sûriyeyê derbarê şehîd daxuyaniyek nivîskî da.
Daxuyanî bi vî rengî ye:
“Em wek Tevgera Ciwanên Şoreşger a Bakur û Rojhilatê Sûriyeyê, Şehîd Çiya Rizgar ku bi xebatên xwe yê li Rojava meşandiye re xwedî kedeke mezin bû, bi jiyan û sekna xwe her tim ji hevalên xwe û ciwanan re dibû mînak bi rêzdarî û minetdarî bi bîr tînin. Hevaltiya wî ji bo me her tim mînak; jiyana wî ya bi moral û coş rehberê me ya têkoşîne be. Em ê rêheval Çiya di têkoşîna xwe de her tim bidin jiyankirin û hedef û armancên wî di têkoşîna xwe de bi ser bixin.
Şehîd Çiya Rizgar di ciwanî de bi tevlîbûna şerê azadiyê re ji Bakur heya Rojavayê Kurdistanê bûye xwedî jiyaneke fedaiyane. Bi taybetî di xebatên ciwanan de, di ronîkirin û rêxistinkirina ciwanan de, di arestekirina xeta berxwedanê de rista pêşengtiyê hilgirt. Bi sekin, kesayet, mutevazîbûn, fedekarî û şewqa xwe bûye sembola hevaltiya rast ji bo hemû kesên ku wî nas dikin. Beramberê her cure pirsgirêkan her tim hêza çareserî û ronakbîrî di xwe de afirand.
Di berxwedana Nisebînê de bi sekna xwe ya bi biryar ji bo gelê xwe û hevalên xwe bû hêvî. Hevrê Çiya Rizgar, di şoreşa Rojava de jî bûye pêşengê têkoşîna ciwanan; bi kesayeta xwe ya fedaî û dilnizim bûye milîtanek mînak ê Apoyî. Li gel nexweşiya xwe jî her tim têkoşiya û heya kêliya xwe ya dawî jî israra xwe ya ji bo berxwedana li ser xeta Rêbertî domand.
Hêza herî dînamîk ê şoreşa Rojava ciwan in. Xwedî derketina li şehîdên xwe qasî jiyandina bîranîna wan, di heman demê de bi fikir û felsefeya Rêbertî re xewn û xeyalên wan pêkanîn e. Jiyana şehîd Çiya Rizgar nîşanî me dide ku bêyî pêşengiya ciwanan şoreş berfireh nabe, azadî pêk nayê. Wek mîrateya herî bi nirx a ku ciwan ji xwe re mînak bigirin, ruhê wî yê berxwedêr, coş û moralê wî, fedakariya wî, mûtevazî bûna wî û azmê wî ye.
Di şexsê wî de em car din dibînin ku şehîdên me rêberê herî mezin ê têkoşîna me ya azadiyê ne. Bîranîna Şehîd Çiya Rizgar dê di sekna bi biryar, rêxistinî û fedaî ya ciwanan de bijî. Em jî bi xwedî derketina têkoşîna wî re soza xwe dubare dikin ku meşa xwe ya di rêya şoreşê de bidomînin û xewnên şehîdên xwe pêk bînin.
Di serî de malbata şehîd Çiya Rizgar em ji hemû gelê Kurdistanê re sersaxiyê dixwazin. Bi xwedî derketina bîranîna wî re em soza xwe dubare dikin ku li ser esasê felsefeya Rêbertî armancên wî bi cih bînin û Şoreşa Rojava mezin bikin.
Şehîd Namirin!
Bijî Serok APO!”
