Dorpêça li ser taxên Şêxmeqsûd û Eşrefiyê tevî agirbesta di navbera Rêveberiya Xweser û Hikûmeta Demkî ya Sûriyeyê de, di roja 3’emîn de dewam dike.
Hevserokê Meclisa Taxên Şêxmeqsûd û Eşrefiyêç Nûrî Şêxo derbarê dorpêçê ji Ajansa Nûçeyan a Hawar (ANHA) re axivî. Şêxo diyar kir ku hikumeta veguhêz êdî hewl dide kiryarên xwe yên ambargo û êrîşa li dijî sivîlan rewa bike û got: “Tiştê beriya 3 rojan bûye hewla qirkirinê bû.”
Şêxo destnîşan kir ku qutkirina rêyan, înternet, kehrebeyê û qedexeya derbasbûna xurek, derman, şîrê zarokan û sotemeniyê û hewldana pêlêkirina xwepêşandêran bi panzer- tanakan û bikaranîna guleyan, hemû nîşaneyên pêkanîna komkujiyên li dijî sivîlan in.
Şêxo diyar kir ku “Hemû hincetên bêbingeh ên ku van êriş û sûcan rewa dikin, derew in. Hikûmeta veguhêz hewl dide bi van hincetan zexta ku ji hemû aliyan ve li ser tê kirin, kêm bike. ”
Nûrî Şêxo diyar kir ku divê bikaranîna siyasetên birçîkirinê di diyalogê de ji saziyên navneteweyî re were ragihandin da ku wekî garantor kar bikin û berteka xelkê her du taxan li hember hewlên qirkirinê silav kir.
Di berdewama axaftina xwe de Şêxo got kanalên peywendiyên wan sabit in, lê hin nakokiyên hundirîn di navbera komîteyên hikumeta veguhêz bi xwe de hene, bi taybet bi destwerdana ji hêla dewleta Tirk ve. Ji ber ku dewleta Tirk mijara vekirina rêyan asteng dike.
Di dawiyê de Nûrî Şêxo got: “Em hewldanên xwe yên ji bo vekirina rêyan ku daxwazên sereke yên gel in, didomînin.”
