Donald Trump, ji ber veguhestina fonên giştî ji bo alîgirên xwe, efûkirina bacê û muameleyên borsayê yên derbarê pişkên wan pargîdaniyên ku di nav gel de piştgiriya wan dike, ji aliyê dijberên xwe ve bi tawanbariya ku di mijara gendeliyê de gaveke din bi pêş de çûye, tê gunehbarkirin.
Piştî ku doza ku Trump berê li dijî Rêveberiya Dahatên Navxweyî ya DYA’yê (IRS) vekiribû bi lihevhatinê bi dawî bû, hat ragihandin ku dê foneke tezmînatê ya dij-amûrkirinê ya bi qasî 1,776 milyar dolarî bê avakirin.
Rêveberiya Trump angaşt kir ku armanca vê fonê “çareserkirina mexdûriyetên” wan alîgirên Trump e ku di serdema serokê berê Joe Biden de lêpirsîn li ser wan hatibû kirin. Lê belê opozîsyon diyar dike ku çavkaniya navborî tê wateya bikaranîna pereyên giştî ji bo dilsoziya siyasî.
Hat diyarkirin ku di nav sûdwergirekên mimkin ên vê fonê de, dibe ku hinek ji wan kesên ku di 6’ê Rêbendana 2021’an de beşdarî serdegirtina Kongreyê bibûn û ji aliyê Trump ve hatibûn efûkirin jî hebin. Du efserên polîsan ên ku di roja bûyerê de li ser erkê bûn, li dijî bikaranîna çavkaniyên giştî ji bo serhildêr û komên paramîlîter doz vekirin.
Rêberê Senatoya Demokratan Chuck Schumer, ev lihevhatin wekî “dizê ku bankeyê bi rê ve dibe, xwe bi xwe efû dike” bi nav kir. Senatorê Komarparêz Bill Cassidy jî anî ziman ku gelê ku di nava tengasiyên aborî de dijî dê bertekê nîşanî foneke wiha bide.
Li aliyê din, muameleyên borsayê yên ku Trump di heyama dawî de kirine jî nîqaşên nû bi xwe re anîn. Di belgeyên fînansî yên ku ji bo gel hatine eşkere kirin de, hat angaştkirin ku Trump pişkên hinek pargîdaniyan, tam beriya daxuyaniyên xwe yên giştî yên ku piştgiriya wan pargîdaniyan dikin, kirîne. Rexneger diyar dikin ku ev yek dikare bibe wateya “bi bandora serokatiyê arastekirina bazarê”.
Malbata Trump tawanbarî red kirin. Kurê Trump, Eric Trump, angaşt kir ku biryarên veberhênanê ji aliyê saziyên fînansî yên serbixwe ve tên birêvebirin, her wiha Alîkarê Serok JD Vance jî bi gotina “Trump di Ofîsa Oval de rûneniştiye û pişkan nastîne û nafiroşe” û rexne wekî tewş nirxandin.
Pispor didin zanîn ku ev rûdanên ku diqewimin, dibin sedem ku sînorên navbera meqamê serokatiyê û berjewendiyên kesane li DYA’yê ji nû ve bên nîqaşkirin.
