Trump di daxuyaniya xwe ya li ser medyaya dijîtal Truth Socialê de anî ziman ku ew weke ‘’Serokê Konseya Aşitiyê’’ piştgiriyê dide komîteya derbasbûnê ya ji 15 teknoratên Filistînî pêk tê.
Trump diyar kir ku komîteya berbehs wê ji ‘’birêvebirina serdema derbasbûnê’’ ya Xezeyê re berpirsiyar be û da zanîn ku konsey wê ji aliyê endazyarê înşaetê yê Filistînî û burokratê pilebilind ê berê Ali Shaath ve were birêvebirin. Shaath wê ji birêvebirina qonaxa yekemîn a jinûveavakirina Xezeyê berpirsiyar be.
Qonaxa duyemîn a plana DYE’yê ya têkildarî Xezeyê roja Çarşemê keye meriyetê. Nûnerê Taybet ê Rojhilata Navîn ê DYE’yê Steve Witkoff diyar kir ku ev qonax jinûveavakirina Xezeyê armanc dike û Trump jî bal kişand ser girîngiya ‘’lihevkirineke demîlîtarîzasyona gerdûnî’’ ya bi temamî bêçekkirina Hamasê, teslîmkirina hemû çekan û belavkirina hemû tûnelan armanc dike.
Her wiha Trump bang li Hamasê kir ku ew demildest cenazeyê dawîn ê ku divê teslîmî Îsraîlê bike, teslîm bike. Îsraîl, Hamasê bi gîrokirina pêvajoyê sûcdar dike û Hamas jî dibêje ku ew ji ber wêraniya li Xezeyê û bêderfetiyên teknîkî zehmetiyan dikşînin.
Di çarçoveya planê de ji bo dabînkirina ewlehiya Xezeyê û perwerdekirina hêzên polîsên Filistînî tê derpêşkirin ku Hêza Aramiyê ya Navneteweyî jî were avakirin. Tê payîn ku operasyonên li qadê ji aliyê Nûnerê Taybet Pêvajoya Aşitiya Rojhilata Navîn yê NY’ê û dîplomatê Bulgar Nickolay Mladenov ve were birêvebirin. Tê ragihandin ku li gel DYE’yê wê nûnerên welatên weke Ingilistan, Elmanya, Fransa, Îtalya, Erebistana Siûdî, Qeter, Misir û Tirkiye jî di konseyê de cih bigirin.
Li Xezeya ku ev du sal in lê şerekî dijwar û wêraniyeke mezin heye, sînor û xalên derbasbûnê hê jî di bin kontrola Îsraîlê de ne. Li gorî çavdêrên navneteweyî li herêmê pirsgirêka xwarin, ava paqij, derman û sotemeniyê gihiştiye astên krîtîk.
