Parêzer Rûşîn Hido qala kiryarên dewleta Tirk ên di Efrînê de tên kirin kir û wiha dest bi axaftina xwe kir, “dewleta Tirk tevî çeteyên girêdayî xwe li Efrînê li derveyî zagonên navneteweyî kar kirin, yek ji wan hevpeymana Lahey, hevpeymana Cenevre ne (…) Yek ji wan hevpeymana dibeje, nabe tu dagirkerî xelkên herêmê ê resen ji herêmê derbixe û şûna wan xelkên ji derveyî herêmê tê de bi cih bike. Lê weke ku tê dîtin ku dewleta Tirk û çeteyên wê barovajî vê dikin, gelê Efrînê ji herêmê derxist û li şûna wan gelên derveyî herêmê bi cih kir. Ev jî tê wateya ku guhertinek demografîk bi berfirehî li Efrînê pêk hat.”
Parêzer Rûşîn Hido di dewama axaftina xwe de diyar kir ku ji despêka dagirkirina herêma Efrînê ve her cûre êşkence li gel hatiye kirin û got, “Çeteyên dewleta Tirk her cûre êrîş li gel kirin, bi taybetî li ser jina Efrînî. Jinên li Efrînê rastî girtin, revandin, qetilkirin û êşkenceya cesedî, derûnî û cinsî hat, ku ev yek dikevin ber sûcên şer û sûcên li dijî mirovahiyê.”
Rûşîn Hido di nav axaftina xwe de anî ziman ku gelê Efrînê gelek caran rastî koçberiyê hat û got, “Gelê Efrînê gelek caran rastî koçberiyê hatin, hin ji wan di dema aloziya Sûriyeyê de ji Helebê derbasî Herêma Efrînê bûn. Piştre hemû gel ji ber dagirkeriya Dewleta Tirk û çeteyên wê ji Herêma Efrînê koçberî Herêma Şehba bûn û herî dawî jî koçberiya ji Şehba ber bi kantona Firat û Cizîrê ve. Gelê Efrînê 7 salan di bin hemû zor û zehmetiyan de û li hember hemû êrîş û topbaranên dewleta Tirk û dorpêçkirina rejîma Esed de ku li ser herêmê ferz kiribû li ber xwe da. Tenê bi armanca vegereke bi ewleh li cih û welatê xwe, lê berovajî vê hate kirin. Dewleta Tirk careke din Herêma Şehba dagirkir û gelê Efrînê û gelê Şehba careke din bi darê zorê koçber bûn.”
Rûşîn Hido got, “Di koçberiya ji Şehba de çeteyên dewleta Tirk ketin nav konvoya gel û beşek ji wan bi darê zorê berê wan da Efrînê. Lê ev yek di vir de nesekinî, ew gelê ku derbas bû jî li wir rastî her cûre revandin û êşkencê hatin. Niha vegera li Efrînê zehmet e, ji ber ku dagirkerî bi çeteyên xwe hîn li Efrînê ye û mafên mirovan binpê dike.”
Di dawiya axaftina xwe de Parêzer Rûşîn Hido diyar kir ku daxwaza gelê Efrînê ew e ku vegerek bi lez û ewle were pêk anîn û ev got, “Ji bo ku gelê Efrînê vegere cih û warê xwe divê dagirkerî ji Efrîn derkeve. Ji bo li gorî zagonên navdewletî dagirkerî rewşeke demkî ye û divê li ser Efrînê rabe. Li kêleka wê ev komçeteyên di Efrînê de werin derxistin û guhertina demografî di Efrîn de were sekinandin. Tenê dema ev pêkhatin gelê Efrînê wê bikaribe bi ewleh vegere û bi aştî bijî. Li ser vê esasî em bang li saziyên navdewletî û bi taybet yekîtiyên yekbûyî dikin ku ev dagirkerî bi dawî bibe û gel bi awayek ewle vegere Efrînê.”
