Xelkê Kobanê bi wesîleya salvegera Banga Rêber Apo ya Aştî û Civaka Demokratîk a 27’ê Sibata 2025’an, mîtîngek lidar xist. Şêniyên beşdarî mîtîngê bûne ji ANF’ê re axivîn.
‘BANGA RÊBER APO AŞTIYÊ LI ROJHILATA NAVÎN MISOGER DIKE’
Hesen Mamo diyar kir ku banga Rêber Apo ji bo tevahî Rojhilatê Navîn jî aştiyê tîne û got: “Ji dîrokê heta roja me ya îro, her tim xwestin mafê me binpê bikin. Bi Rêber Apo re gelek pêvajoyên aştiyê destpê kirin, lê tenê yekalî diman. Niha banga Aştî û Civaka Demokratîk ew e ku mafê me bê parastin û standin. Niha gavên şênber hatin avêtin. Gerîla gavên mezin avêtin, xwe fesix kirin, çekên xwe şewitandin û heta ji qadên Bakurê Kurdistanê jî vekişiyan. Êdî bi şer tiştek nayê çareserkirin, êdî bi aştiyê çareserî dibe. Em weke gel bi Rêberê xwe bawer in û em piştgirê vê bangê û vê pêvajoyê ne.”
‘ÊDÎ EM DIXWAZIN BI RÊBERÊ XWE DI NAVA KURDISTANEKE AZAD DE JIYAN BIKIN’
Dayîka bi navê Necmê Kinco jî wiha got, “Em li pey Rêberê xwe ne. Rêberê me bingeha azadiyê ji me ra danî. Me çekên xwe şewitandin. Zarokên me xwe ji qada Bakur vekişandin. Me her tişt kir, lê hîn jî ev pêvajo yekalî ye. Em Kurd in. Zimanê me ev e. Em bang li demokratan dikin ku rabin ser piyan. Em êdî dixwazin Rêberê me di nava me de be. Rêberê me çavê tevahî cîhan ji Kurdan re vekir. Êdî em jî dibêjin sebra me nemaye. Divê demildest Rêberê me fîzîkî di nava me de be. Êdî em dixwazin Rêberê me di nava me de be û em di Kurdistaneke azad de jiyan bikin. Pêvajoya niha em xwedî lê derdikevin.”
‘BI RUH Û CAN EM BI PEYAMA RÊBER APO RE NE’
Dayîka bi navê Emîne Şêxo ragihand ku ew niha di komployekê de careke din derbas dibin, lê bi fikrê Rêber Apo dê ew komplo têk biçe û got: “Niha komployeke tunekirin, înkar û îmhayê li ser me tê meşandin. Wê fikrê Rêber Apo bibe wesîleya têkbirina wê komployê. Em Rêberê xwe ji vir heta Îmraliyê silav dikin. Em ê heta dawiyê bi Rêberê xwe re bin. Em û zarokên xwe bi ruh û can bi te re ne. Êdî sebra me nema ye, êdî em dixwazin Rêberê xwe di nava xwe de bibînin.”
