Li bajar û bajarokên parêzgeha Hesekê gel li dijî revandin û qetilkirina şervanê Tûgaya Hesekê Sîpan (Samî Şêxmûs Hiso) meşên girseyî li dar xist.
QAMIŞLO
Li bajarê Qamişloyê bi hezaran kes ji çerxerêya Sonî heya çerxerêya Şehîdan meşiyan. Di meşê de dirûşmên dilsoziya bi şehîdan re, şermezarkirina şehîdxistina Sîpan û hesabpirsîna ji sûcdaran hatin berzkirin.
Girse li çerxerêya Şehîdan sekinî û deqeyek rêz hat girtin. Piştre bi navê Îsiyatîfa Gel a Qamişloyê daxuyanî hat xwendin.
Di dauxyaniyê de hat bibîrxistin ku sûcê şehîdxistina Sîpan sûcê sêyemîn e ku di dema dawîn de hatine kirin. Hate diyarkirin hêzên ku dixwazin pêvajoya entegrasyonê bi ser nekeve û Kurd mafên xwe dewleta Sûriyeyê de bi dest nexin li pişt van sûcan in.
Di daxuyaniyê de hate gotin, hin hêz ji bo pêkanîna planên xwe hewl didin istiqrarê xirab bikin, tirs û nebaweriyê di nava şêniyan de çêbikin û herêmê ber bi krîzê ve bibin.
Di daxuyaniyê de bang li hikumeta veguhêz hat kirin ku vî sûcî ronî bike, lêkolîneke zelal bide destpêkirin û li gorî qanûnê hesab ji sûcdaran bipirsîn. Her wiha bang li şêniyan hat kirin ku hişyar bin, hevgirtî bin, yekitiya xwe biparêzin û rê nedin tu aliyekî ku wan ji bo berjewendiyên xwe yên siyasî bi kar bînin.
ÇILAXA
Li bajarê Çilaxayê jî bi tevlêbûna şênî, malbatên şehîdan, nûnerên partiyên siyasî, rûspiyên eşîran Kurdan û endamên tevgerên jinan çalakiyek li pêşiya avahiya PYD‘ê ya li taxa Resafayê hat lidarxistin. Di çalakiyê de daxuyaniyek bi navî Însiyatîfa Gel hat xwendin.
Daxuyanî ji aliyê endamê însiyatîfê Feysel Hesen ve hat xwendin. Di daxuyaniyê de sûcê li dijî Sîpan bi tundî hat şermezarkirin û hate gotin, ev sûc pîvanên mirovî û exlaqê derbas kiriye.
Di daxuyaniyê de bang hat kirin ku lêkolîneke zelal were destpêkirin û hesab ji berpirsên vî sûcê were pirsîn. Her wiha bang li hikumeta veguhêz hat kirin ku berpirsyariyên xwe yên parastina ewlehiya tevahî pêkhateyên herêmê bi cih bîne, sînorekî ji belavkirina çekên li derveyî çarçoveya dewletê deyne û ji bo avakirina welatekî ewle ji bo tevahî pêkhateyên wê bixebite.
Di dawiya daxuyaniyê de provokasyon, zimanê kîndarî û fitneyê hatin redkirin û banga aştiya navxweyî û pêkanîna edaletê hat kirin.
GIRKÊ LEGÊ
Li bajarê Girkê Legê jî bi heman armancê meşek ji qada Şehîdan heya sûka navendî hat lidarxistin. Di meşê de dirûşmên dilsoziya bi şehîdan re û şermezarkirina şehîdxistina Sîpan hatin berzkikrin.
Li sûka navendî deqeyek rêz hat girtin û bi navê Îsiyatîfa Gel a Girkê Legê daxuyaniyek ji aliyê Şehnaz Ebdo ve hat xwendin. Di daxuyaniyê banga hesabpirsînê ji qatilan hat kirin û hate diyarkirin ku mîna vî sûcê dê fitneyê çêbike û aştiya navxweyî têk bibe.
Şehnaz Ebdo bang li hikumeta veguhêz kir ku berpirsyariyên xwe bi cih bîne û lêkolîneke der barî vî sûcê de veke, di heman demê de hesab bipirse.
Ji rêveberên Meclisa Malbatên Şehîdan a Herêma Cizîrê Mihemed Cemîl jî axivî û anî ziman ku şehîd Sîpan ji bo parastina tevahî Sûriyeyan tê dikoşiya û li ser qetilkirina wî divê hesab ji sûcdaran were pirsîn.
HESEKÊ
Li bajarê Hesekê jî bi sedan kes ji bo şermezarkirin revandin û qetilkirina Sîpan ji çerxerêya Kevokê ya li taxa Til Hecer heya çerxerêya Şehîd Serhed a li taxa Mifî meşiyan. Di meşê de pankartên bi nivîsên banga pêkanîna edaletê û hesabpirsînê ji sûcdaran hatin vekirin. Her wiha dirûşmên şermezarkirina şehîdxistina Sîpan û banga yekitiyê li Kurdî hatin berzkirin.
Meş li çerxerêya Şehîd Serhed veguherî mîtîngê. Li vir endamê Meclisa Giştî ya PYD‘ê Ebduxenî Oso axivî. Oso bang li hikumeta veguhêz kir ku li hemberî vê bûyerê helwesteke cidî nîşan bide û sûcdaran aşkera bike.
Oso di dewama axaftina xwe de anî ziman ku gel bi salane li hemberî fitneyê sekinî û herêm ber bi aştiyê ve bir.
Bi navê Kongreya Îslama Demokratîk Şêx Abdullah Ilêwî jî axivî û got, gelê Sûriyeyê piştî salên dirêj ên şer û koçberiyê gihaştiye qonaxekê ku aştî û rêgirtina li ber fitneyan hewce dike. Ilêwî bang li pêkhateyên herêmê kir ku neyên lîstokan û guh nedin provokasyonan.
TIRBESPIYÊ
Meclisa Malbatên Şehîdan a Tirbepsiyê jî bi beşdariya şênî û endamên saziyên sivîl meşek li dar xist.
Meş ji pêşiya avahiya Meclisa Malbatên Şehîdan dest pê kir. Di meşê de dirûşmên bi banga hesabpirsîna ji qatilên şehîd Sîpan û pêkanîna edaletê hatin berzkirin.
Meş li sûka navendî rawestiya û deqeyek rêz hat girtin. Li vir endamê Meclisa Malbatên Şehîdan Nûredîn Şakir axivî. Şakir xwest qatilên şehîd Sîpan werin aşkerakirin û hesab ji wan were xwestin.
Nûredîn Şakir anî ziman ku dê şopdarên rêya şehîdan bin û destkeftiyên ku bi saya wan hatin bidestxistin, mafên çandî û zimanî yên gelê Kurd biparêzin.
DÊRIK
Şêniyên bajarê Dêrikê jî çalakiyek li dar xist û daxwaza edalet û hesabpirsînê ji qatilan xwest.
DIRBÊSIYÊ
Şêniyên bajarê Dirbêsiyê bi heman armancê ji qada Jinê heya sûka navendî meşiyan. Girseya wêneyên şehîd Sîpan hildan bûn, bê navber dirûşmên şermezarkirina bûyerê û dilsoziya bi şehîdan re berz kirin.
Meş li sûka navendî ya bajêr sekinî û deqeyek rêz hat girtin. Piştre bi navê Însiyatîfa Gel a bajarê Dirbêsiyê daxuyaniyek hat xwendin. Endamên îsiyatîfê Rexda Şihada bi zimanê erebî û Îbrahîm Hesen bi zimanê kurdî daxuyanî xwendin.
Di daxuyaniyê de qetilkirina şehîd Sîpan hat şermezarkirin û banga edalet û hesabpirsînê ji qatilan hat kirin.
