Şêniyên Wanê ji ANF’ê re qala bendewariyên xwe yên ji ‘Komîsyona Demokrasî, Xwişk-Biratî û Pitşevaniyê’ ya li Meclîsê kirin.
‘DIVÊ EM DESTÊ RÊBER APO XURT BIKIN’
Emîn Karaman destnîşan kir ku pêvajoya aştiyê gelekî girîng e, divê her du alî bi berpirsyarî rabin û got, “Divê gelê Kurdistanê bi temamî xwedî li pêvajoya aştiyê derkeve. Divê em xwedî li vê rêyê derkevin ku Rêber Apo ava kiriye. Ji bo gelê Kurd ev pêvajo bi rastî jî girîng e. Girîng e em destê Rêber Apo xurt bikin. Divê em li çar parçeyên Kurdistanê firsendê nedin dijminan. Divê em xwedî li ewladên Kurdan derkevin ku bi salan li çiyayên Kurdistanê şer kirin. Divê em xwedî li ziman û çanda xwe derkevin û li hemberî wan hêzan têbikoşin ku qedexe kirine. Em li her qadê daxwaza aştiyê tînin ziman. Ji niha û pê ve girîng e dewlet gavan biavêje.”
‘LI HEMBERÎ MEJIIYÊ KOMKUJER EM BI FIKAR IN’
Ayten Saygul jî destnîşan kir ku weke dayik ew li her qadê ji bo aştiyê têdikoşin û got, “Ji aliyekî ve em ji vê pêvajoyê bawer dikin ji ber Rêber Apo, lil aliyê din jî em bi fikar in, ji ber ku li hemberî me zîhniyeteke komkujer heye ku bi sedan sal in dijminatiyê dike. Em ji Rêber Apo bawer dikin. Bendewariya me ya ji pêvajoyê gelek e. Beriya her tiştî em mafê xwe yê perwerdeya bi zimanê dayikê, mafê çand û hunerê, mafê nasnameyê û jiyana azad a li xaka xwe dixwazin.
Ya herî girîng jî em daxwaza azadiya Rêber Apo dikin. Aştî bi azadiya Rêber Apo dibe. Divê girtiyên siyasî hemû bêne berdan. Ji bo aştî pêk were divê ev bêne kirin. Kî destê aştiyê dirêj bike em ê li gel wî bin. Em naxwazin êdî dayik bigirin.”
‘MAFÊN KURDAN DIVÊ BI DESTÛRA BINGEHÎN BÊNE EWLEKIRIN’
Seyhan Bozkûş destnîşan kir ku kevirê bingehîn ê aştiyê azadiya Rêber Apo ye û got, “Eger pêvajoyek ji aliyê Rêber Apo ve hatibe destpêkirin li wê derê bawerî, moral û serketin heye. Pêvajoya ku ji aliyê Rêber Apo ve hate destpêkirin, ji bo Kurdistanê pêngaveke nû bi xwe re aniye. Ev pêngav ji bo gelê Kurd bûye cihê baweriyê. Ji bo vê pêvajoya ku Rêber Apo da destpêkirin, hin mijar hene ku divê dewlet têkildarî wan gavê biavêje.
Bendewariya destpêkê ya ciwanên Kurd azadiya Rêber Apo ye. Rêber Apo naxwaze gelê Kurd dest ji daxwazên xwe berde. Dixwaze çand, ziman û nasnameya Kurdan bêne naskirin. Divê ev hemû bi destûra bingehîn bêne ewlekirin. Heta ku ev daxwaz di destûra bingehîn de neyên ewlekirin wê pêvajoya aştiyê bixitime. Em naxwazin pêvajoya aştiyê bixitime. Cihê çareseriyê azadiya Rêber Apo û maseya çareseriyê ye.”
‘DIVÊ ÊDÎ DEWLET JÎ GAVÊ BIAVÊJE’
Sînan Ok destnîşan kir ku gelê Kurd ji bo mafên xwe têdikoşe û ew piştgiriyê dide pêvajoya aştiyê û got, “Em dixwazin gelê Kurd bi îrade, nasname û zimanê xwe bê naskirin. Rêber Apo û PKK’ê gavên girîng avêt, lê belê divê êdî dewlet jî gavê biavêje. Ji bo vê komîsyonek hate avakirin. Ev komîsyon divê tavilê wan gavan biavêje ku bersivê bide daxwazên gelê Kurd.”
