Dewleta Tirk a dagirker ji destpêka Şoreşa Rojava û heta niha tevahî gundên li ser sînor bi rojane gulebaran dike. Gel ji ber gulebarana zêde ne dikarin herin nava zeviyên xwe û ne jî berhemên xwe yên ji daran berhev bikin.
Du rojan beriya niha dîsa dewleta Tirk a dagirker êrîşî bajarê Kobanê kir û di encama êrîşê de guleyeke dewleta Tirk li zarokekî bi navê Welat Horan dikeve û ew bi giranî birîndar dibe.
Welat Horan têkildarî hûrguliyên bûyerê ji ANF`ê re axivî û ev yek anîn ziman: “Ez li pêşiya dikana xwe ya ku lê kar dikim, bûm. Di saet 8`an de ez derketim ber devê derî ku karê me hîna jî berdewam dikir. Bi tenê dîtina ku min dîtî, gule li me wer bûn, hemû hatin ser dikanê û yek li bin çengê min ket. Lê min hay ji xwe tune bû, dema ku ez reviyan paşiya dikanê hevalê min gazî min kir û got ku xwîn ji laşê te diherike. Ji ber fîşekê pişta min gelekî diêşe û ez nikare bêhnê bistînin.’’
Welat Horan ê 15 salî, niha di nexweşxaneyê de ye û li gorî agahiyên ku ajansa me ji bijîşkan wergirtine, jiyana welat di xeteriyê de ye. Her wiha wê îro Welat were emeliyatkirin û bijîşk jî dibêjin jiyana wî di xeteriyê de ye û ew niha di bin çavdêriya lezgîn de ye.
Hêjayî bibîrxistinê ye ku demekê beriya niha jî li Gundê Sêlim yê girêdayî bajarê Kobanê dîsa dewleta Tirk zarokekî 14 salî ku pezê xwe diçêrand, hedef girtibû. Zarokê 14 salî ji neçarî reviyabû û jiyana xwe xilas kiribû lê belêdi encamê de pezek hatibû kuştin.
